رسولِ خدا صلی اللہ علیہ وآلہ کی اقتصادی سیرت کی پیروی آج کی معاشی زندگی کی ضرورت
بعثت سے قبل رسولِ خدا صلی اللہ علیہ وآلہ کی تجارتی سرگرمیوں اور اقتصادی رویّوں کا ازسرِنو مطالعہ، پیشہ ورانہ اخلاق، امانت داری اور انصاف کا ایک جامع اور لازوال نمونہ ہمارے سامنے پیش کرتا ہے۔
یہ وہ اہم اور نظرانداز شدہ اصول ہیں جن کا جدید کاروباری ماحول میں عملی نفاذ، بازار کے نظام کی صحت و سلامتی اور عوامی اعتماد کے حصول کی ضمانت بن سکتا ہے۔
ہمارے ایک ساتھی رپورٹر نے اسی موضوع پر ایک رپورٹ تیار کی ہے، آئیے اسے دیکھتے ہیں:
رسولِ خدا صلی اللہ علیہ وآلہ کی بعثت سے قبل عرب معاشرے میں کامیابی اور روحانی اثر و رسوخ کے عوامل کا تجزیہ کیا جائے تو آپؐ کی نمایاں صفت ’’محمد امین‘‘ آپؐ کی اخلاقی اور عملی خوبیوں میں سب سے نمایاں نظر آتی ہے۔
حضرت محمد مصطفیٰ صلی اللہ علیہ وآلہ کی امانت داری، راست گوئی اور تجارتی معاملات میں بصیرت و تدبر کی شہرت اس قدر مضبوط ہو چکی تھی کہ اُس دور کے بڑے سے بڑے اور سخت گیر تاجر بھی اپنا سرمایہ اور تجارتی انتظام مکمل اعتماد کے ساتھ آپؐ کے سپرد کر دیتے تھے۔
اسلامی تاریخ کی معتبر روایات کی بنیاد پر کہا جا سکتا ہے کہ آپؐ کی اقتصادی سیرت ایسے ناقابلِ تخلف اصولوں پر قائم تھی، جن میں معاملات میں مکمل صداقت، مالِ تجارت کی واضح اور درست وضاحت، وعدوں کی پابندی اور دھوکے اور فریب سے سخت اجتناب شامل تھا۔
رسولِ خدا صلی اللہ علیہ وآلہ اپنے تجارتی معاملات میں یک طرفہ منفعت پسندی کو مسترد فرماتے تھے اور حقیقی نفع کو فریقین کے حقوق کی رعایت اور اللہ تعالیٰ کی رضا کے حصول میں دیکھتے تھے۔
آپؐ کا یہ عادلانہ طرزِ عمل اُس دور کی منڈی میں اخلاقی معیار کا ایک نیا تصور پیش کرتا تھا اور بے حد و حساب منافع خوری کے روایتی تصورات کو بدل دیتا تھا۔
آج کے دور میں، روزگار اور جدید بازار کے اتار چڑھاؤ کے درمیان، اقتصادی زندگی کے لئے ’’محمد امین‘‘ کے نمونے کی طرف رجوع کی ضرورت پہلے سے کہیں زیادہ محسوس ہوتی ہے۔
پیچیدہ کاروباری نظام اور جدید مارکیٹنگ کے طریقوں کے دور میں عدمِ شفافیت، گمراہ کن اشتہارات، اجتماعی مفاد پر ذاتی منفعت کو ترجیح دینا اور وعدوں و معاہدوں کی خلاف ورزی جیسے مسائل معاشرے کی ذہنی صحت اور اقتصادی سلامتی کو خطرے میں ڈال رہے ہیں۔
نبوی سیرت کو آج کے پیشہ ورانہ اور کاروباری معاملات پر منطبق کرنے سے معلوم ہوتا ہے کہ امانت داری صرف دوسرے شخص کے مال کی حفاظت کا نام نہیں، بلکہ معیارِ اشیا و خدمات کی ذمہ داری، مصنوعات کے تعارف میں سچائی، سماجی ذمہ داریوں کی پابندی اور صارفین کے اعتماد کا احترام بھی اس میں شامل ہے۔
اسلامی بازار میں اس اعلیٰ نمونے کو فروغ دینا اور عملی جامہ پہنانا، رزق میں برکت اور پائیدار اقتصادی ترقی کے علاوہ، معاشرے کے مختلف طبقات میں اخلاق، اعتماد اور انسانی کرامت کی روح پیدا کرنے کا ذریعہ بھی بنے گا۔
اسی لئے پیشہ ورانہ اور تجارتی اداروں کے بنیادی ڈھانچے میں اصیل نبوی معیار و اقدار کو رائج کرنا آجروں، کارکنوں اور خریداروں کے درمیان باہمی اعتماد کی بنیادوں کو مضبوط کرے گا اور ہمہ جہت ترقی و خوشحالی کے نئے امکانات پیدا کرے گا۔
