مشی اربعین کے آغاز کے ساتھ ہی عوامی مواکب کی خدمت رسانی کا آغاز

سالانہ تاریخی مشی اربعین کا آغاز چند روز قبل ہو چکا ہے۔ اسی مناسبت سے امام حسین علیہ السلام نیٹ ورک کے 6 ٹیلی ویژن چینلز پر اربعین کی پیادہ روی اور خصوصی پروگراموں کی براہِ راست نشریات فارسی، عربی، انگریزی، ترکی اور اردو زبانوں میں 20 صفر المظفر تک جاری رہیں گی۔

اس عظیم شعیرۂ حسینی کے آغاز کے ساتھ ہی عوامی خدمت گزار مواکب نے بھی اپنی سرگرمیوں کا آغاز کر دیا ہے۔

مشی اربعین کے آغاز کے بعد عراق کے مختلف صوبوں اور شہروں سے لاکھوں زائرین پیدل کربلائے معلیٰ کی جانب رواں ہیں تاکہ روضۂ مبارک حضرت امام حسین علیہ السلام کی زیارت کی سعادت حاصل کر سکیں۔

اس عالمی روحانی اجتماع میں شرکت کے لئے کویت، افغانستان، پاکستان، ایران، لبنان اور دیگر متعدد ممالک سے بھی زائرین عراق پہنچ چکے ہیں، جبکہ آئندہ دنوں میں دنیا بھر سے لاکھوں مزید عاشقانِ اہلِ بیت علیہم السلام اس عظیم اجتماع میں شریک ہوں گے۔

زائرین کی خدمت کے لئے مختلف شاہراہوں اور پیادہ روی کے تمام راستوں پر حسینی مواکب قائم کر دیے گئے ہیں۔ یہ مواکب ان تمام راستوں پر موجود ہیں جہاں سے زائرین کربلائے معلیٰ کی جانب سفر کرتے ہیں۔

اسی طرح شہرِ مقدس کربلا، خصوصاً قدیم مرکزی علاقہ میں بھی عراق کے مختلف صوبوں سے آنے والے عوامی خدمت گزار مواکب بڑی تعداد میں پہنچ چکے ہیں تاکہ زائرینِ اربعین کو ہر ممکن سہولت فراہم کی جا سکے۔

زائرین کی میزبانی عراق کی ایک قدیم، راسخ اور قابلِ فخر روایت ہے، جو آج بھی پورے اخلاص، محبت اور جذبۂ ایثار کے ساتھ زندہ ہے۔ عراقی شیعہ اپنے جان و مال، نذورات اور شبانہ روز محنت کے ذریعہ زائرینِ حضرت اباعبداللہ الحسین علیہ السلام کی خدمت کو اپنے لیے باعثِ سعادت سمجھتے ہیں۔ وہ نہ صرف کھانے پینے اور دیگر ضروری سہولیات فراہم کرتے ہیں بلکہ اپنے گھروں، حسینیوں اور مخصوص مقامات پر زائرین کی رہائش کا بھی اہتمام کرتے ہیں۔

عراق کی مذہبی انجمنیں، دینی ادارے اور مختلف مذہبی تنظیمیں پیادہ روی کے راستوں پر بڑے بڑے خیمے نصب کرتی ہیں، جنہیں موکب یا مُضیف کہا جاتا ہے۔ ان مواکب میں زائرین کو بلا معاوضہ کھانا، پانی، آرام، طبی امداد اور دیگر ضروری خدمات فراہم کی جاتی ہیں۔ ان کا انتظام و انصرام مکمل طور پر عوامی تعاون اور رضاکارانہ بنیادوں پر ہوتا ہے اور یہ حکومتی انتظام سے آزاد رہتے ہیں۔

گزشتہ کئی دہائیوں سے اس امر پر خصوصی توجہ دی جاتی رہی ہے کہ اربعین کے زائرین کی خدمت، پیادہ روی کے انتظامات اور اس عظیم شعیرۂ حسینی کے تمام امور عوامی تعاون، رضاکارانہ جذبے اور نذورات کے ذریعہ انجام پائیں، تاکہ اس مقدس روایت کی مردمی روح برقرار رہے اور اسے سرکاری شکل اختیار نہ کرنے دی جائے۔

اگرچہ زائرین کی سلامتی، نجف اشرف اور کربلائے معلیٰ میں امن و امان کا قیام، نیز بیرونِ ملک سے آنے والے زائرین کے لئے سفر، ویزا اور انتظامی سہولیات کی فراہمی حکومتِ عراق کی ذمہ داری ہے، تاہم مواکب کی عوامی، رضاکارانہ اور غیر سرکاری حیثیت ہی مشّایۂ اربعین کی نمایاں ترین خصوصیت شمار ہوتی ہے۔ رواں سال بھی اس تاریخی سالانہ اجتماع کے آغاز کے ساتھ ہی یہ عوامی مواکب پوری فعالیت کے ساتھ زائرینِ امام حسین علیہ السلام کی خدمت میں مصروف ہیں اور یہ روح پرور خدمت کا سلسلہ مسلسل جاری ہے۔