کینیڈا کے صوبہ البرٹا میں اسلاموفوبیا پر مبنی ایک حملے کے بعد اس طرح کے بڑھتے ہوئے واقعات پر شدید تشویش کا اظہار کیا جا رہا ہے، جبکہ اسلامی تنظیموں نے حکومت سے فوری کارروائی کا مطالبہ کیا ہے۔
اس حادثہ نے ایک بار پھر کینیڈا کے بعض علاقوں میں بڑھتی ہوئی اسلام دشمنی کے حوالے سے خدشات کو نمایاں کر دیا ہے۔
کینیڈین خبر رساں ادارے “سی بی سی نیوز” کے مطابق، کینیڈا کی مسلم ایسوسی ایشن نے اس حملے کی سخت مذمت کرتے ہوئے حکام سے مطالبہ کیا ہے کہ واقعے کی مکمل، شفاف اور غیر جانبدارانہ تحقیقات کی جائیں اور اس میں ملوث افراد کے خلاف قانونی کارروائی عمل میں لائی جائے۔
تنظیم نے اس بات پر بھی زور دیا کہ اس قسم کے واقعات مسلم کمیونٹی کے امن اور تحفظ کے لیے سنگین خطرہ ہیں۔
رپورٹ میں مزید کہا گیا ہے کہ مذکورہ اسلامی ادارے نے حالیہ برسوں میں اسلاموفوبیا کے بڑھتے ہوئے واقعات کی جانب اشارہ کرتے ہوئے امتیازی سلوک کے خاتمے اور مذہبی اقلیتوں کے تحفظ کے لیے مؤثر اقدامات کا مطالبہ کیا ہے۔
ماہرین کے مطابق اگر یہ صورتحال جاری رہی تو اس کے کینیڈین معاشرے میں پُرامن بقائے باہمی اور سماجی ہم آہنگی پر منفی اثرات مرتب ہو سکتے ہیں۔
