ہندوستان میں 16 سال سے کم عمر بچوں کے سوشل میڈیا استعمال پر پابندی یا عمر کی بنیاد پر ضابطے نافذ کرنے پر غور کیا جا رہا ہے۔
الیکٹرانکس و آئی ٹی کے وزیر اشوینی ویشنو نے کہا ہے کہ حکومت ڈیپ فیکس اور کم عمر صارفین کی رسائی جیسے معاملات پر مختلف سوشل میڈیا پلیٹ فارمز سے مشاورت کر رہی ہے۔
حکومت اطلاعاتی ٹیکنالوجی قواعد 2021 میں ممکنہ ترمیم پر بھی غور کر سکتی ہے، تاہم آسٹریلیا جیسی مکمل پابندی کا امکان فی الحال کم بتایا جا رہا ہے۔ اس سے قبل آسٹریلیا 16 سال سے کم عمر بچوں کے سوشل میڈیا اکاؤنٹس پر پابندی نافذ کر چکا ہے، جبکہ فرانس سمیت کئی دیگر ممالک بھی اسی نوعیت کی قانون سازی پر غور کر رہے ہیں۔
حکومتی اقتصادی سروے میں نوجوانوں میں اسکرین کے بڑھتے استعمال پر تشویش ظاہر کرتے ہوئے عمر کی تصدیق اور دیگر حفاظتی اقدامات کی سفارش کی گئی ہے۔ فی الحال حکومت مشاورت کے مرحلے میں ہے اور حتمی فیصلہ باقی ہے۔
