هندوستان: جامعۃ الزہرا سلام اللہ علیہا لکھنؤ میں جشن فاطمی و جشن تکلیف

هندوستان: جامعۃ الزہرا سلام اللہ علیہا لکھنؤ میں جشن فاطمی و جشن تکلیف

حوزہ علمیہ جامعۃ الزہرا سلام اللہ علیہا ہندوستان میں حضرت فاطمہ زہراء علیها السلام کی ولادت باسعادت اور یومِ تاسیس مدرسہ کی مناسبت سے ایک جشن کا انعقاد کیا گیا، جس میں طالبات نے منفرد پروگرام پیش کئے۔

جشنِ فاطمی کا آغاز تلاوتِ قرآنِ مجید سے ہوا، جس کے بعد مدرسہ کی طالبات نے نہایت خوبصورت انداز میں تواشیح، تقاریر اور قصائد پیش کئے۔

پروگرام میں حوزہ کی معزز اساتذہ اور سینئر طالبات نے عملِ صالح کی اہمیت، خواتین کا کردار اور "حضرت فاطمہ زہراء سلام الله علیها اسوہ حسنہ” کے موضوعات پر تقاریر کی۔

جشن میں جامعہ کے شعبۂ گہوارۂ بی بی معصومہ سلام الله علیها کی طالبات نے بھی بھرپور شرکت کی۔

پروگرام کے دوران طالبات کی جانب سے ایک تعلیمی مناظرہ بھی پیش کیا گیا، جس میں توحیدِ خداوندی اور اقرارِ الٰہی کو مرکزی حیثیت حاصل تھی۔

اس عظیم الشان جشنِ فاطمی میں سنِ بلوغ کو پہنچنے والی (نو سالہ) بچیوں کے لیے ایک باوقار جشنِ تکلیف کا اہتمام کیا گیا۔ جامعہ کی اساتذہ نے بچیوں کو چادر تحفے میں دی اور محترمہ خانم رباب زیدی نے بچیوں سے اصولِ دین اور فروعِ دین کا اقرار عربی عبارات کے ساتھ اردو ترجمہ کے ذریعے کروایا نیز مرجعِ تقلید کے انتخاب سے متعلق بھی رہنمائی فراہم کی۔

تقریب کے دوران حوزۂ علمیہ کا سالانہ تعلیمی مجموعی نتیجہ 98 فیصد ہونے کا اعلان کیا گیا۔ اس میں سترہ طالبات ممتاز قرار پائیں۔ نمایاں کارکردگی دکھانے والی ابتدائی تین طالبات کو نفیس انعامات سے نوازا گیا، جبکہ بقیہ ممتاز طالبات کو بھی بہترین انعامات پیش کئے گئے۔

یومِ ولادتِ حضرت فاطمہ زہراء سلام الله علیها کی مناسبت سے ایک خوبصورت نمائش کا بھی اہتمام کیا گیا جس میں حجاب کی اہمیت، مفید اور معیاری اسلامی کتب کی طرف حاضرین کو متوجہ کیا گیا۔