نذرِ شرعی صرف اس وقت معتبر ہے جب اس کا عھد خدا سے ہو: آیۃ اللہ العظمیٰ شیرازی

نذرِ شرعی صرف اس وقت معتبر ہے جب اس کا عھد خدا سے ہو: آیۃ اللہ العظمیٰ شیرازی

مرجع عالی قدر آیۃ اللہ العظمیٰ سید صادق حسینی شیرازی دام ظلہ کا روزانہ کا علمی جلسہ حسب دستور اتوار 5 ربیع الثانی 1447 ہجری کو منعقد ہوا۔

جس میں گذشتہ جلسات کی طرح حاضرین کے مختلف فقہی سوالات کے جوابات دیے گئے۔

آیۃ اللہ العظمیٰ شیرازی نے نذرِ شرعی پر عمل کرنے کے طریقہ کے بارے میں فرمایا: نذر، نذر کی نیت کرنے والے کے تابع ہے، یعنی جس طرح نذر کرنے والے نے نذر کی ہے، اُسی طرح اُس پر عمل کرنا ضروری ہے۔

معظم لہ نے وجوبِ نذر کی شرائط کے بارے میں فرمایا: نذر میں صیغہ پڑھنا واجب نہیں ہے، اور ضروری نہیں کہ عربی زبان میں ہی ہو، البتہ چند فقہاء نے کہا ہے کہ صیغہ پڑھنا لازم ہے۔

انہوں نے مزید فرمایا: مشہور فقہاء کا نظریہ یہ ہے کہ نذر، عہد اور قسم کا طرفِ خطاب خدا ہونا چاہیے، اگر نذر کا رُخ خدا کے علاوہ کسی کی طرف ہو، چاہے وہ معصومین علیہم السلام ہی کیوں نہ ہوں، تو نذر شرعی محقق نہیں ہوتی۔ اسی طرح لازم ہے کہ نذر زبان سے ادا کی جائے، صرف نیت اور ارادہ کافی نہیں۔

آیۃ اللہ العظمیٰ شیرازی نے یہ بھی فرمایا: اگر نذر کا رُخ خدا نہ ہو تو وہ نذر شرعی نہیں ہے، اور اگر اُس پر عمل نہ کیا جائے تو یہ کام برا ضرور ہے لیکن حرام نہیں ہے اور اس پر کفارہ بھی واجب نہیں۔

واضح رہے کہ مرجع عالی قدر آیۃ اللہ العظمیٰ سید صادق حسینی شیرازی دام ظلہ کے یہ روزانہ علمی نشستیں قبل از ظہر منعقد ہوتی ہیں، جنہیں براہ راست امام حسین علیہ السلام سیٹلائٹ چینل کے ذریعے یا فروکوئنسی 12073 پر دیکھا جا سکتا ہے۔