سامرا میں شہادت امام حسن عسکری علیہ السلام کی مناسبت سے عزاداری کا سلسلہ جاری
روضہ امامین عسکریین علیہما السلام میں 8 ربیع الاول یوم شہادت امام حسن عسکری علیہ السلام کے موقع پر عزاداروں اور زائرین کا ہجوم قابل مشاہدہ ہے۔
سامرا سے شیعہ خبر رساں ایجنسی کے رپورٹر نے یہ بتاتے ہوئے کہ صوبہ صلاح الدین کے شہر سامرا میں امام علی نقی علیہ السلام اور امام حسن عسکری علیہ السلام کے روضہ مبارک میں زائرین کی بڑی اور مسلسل موجودگی قابل مشاہدہ ہے، کہا: عراق کے مختلف صوبوں جیسے بصرہ، ناصریہ، دیوانیہ اور بغداد سے شیعہ زائرین کا ایک بڑا ہجوم سامرا کی جانب بڑھ رہا ہے۔
انہوں نے مزید بتایا: شہر سامرا ان دنوں عراق کے اندر اور باہر سے لاکھوں زائرین کی میزبانی کر رہا ہے۔ جو پیدل روضہ امامین عسکریین علیہما السلام پہنچ رہے ہیں تاکہ زیارت اور خراج عقیدت پیش کریں۔ نیز راستے میں عزادار زائرین کی خدمات کے لئے موکب بھی لگائے گئے ہیں۔
انہوں نے بتایا: سیکورٹی فورسز نے شہر کے اطراف سیکیورٹی کو یقینی بنانے اور زائرین کی حفاظت کے لئے اپنی تعیناتی میں اضافہ کر دیا ہے۔
انہوں نے مزید بتایا کہ روضہ امامین عسکرین علیہما السلام نے شہادت امام حسن عسکری علیہ السلام کے موقع پر خصوصی پروگرامس تیار کئے ہیں جن میں یادگاری مجالس و عزا اور زائرین کو ضروری خدمات فراہم کرنا شامل ہے۔
واضح رہے کہ عراق کے دیگر صوبوں کے روضہ ہائے مبارک بھی ان کوششوں کی حمایت کر رہے ہیں اور اس کے علاوہ سامرا اور دجیل کے علاقوں میں سرکاری تعطیل کر دی گئی ہے تاکہ تمام شہری زیارت کی سعادت حاصل کر سکیں۔
