زائر امام رضا علیہ السلام کو امام جعفر صادق علیہ السلام جنت لے جائیں گے: مولانا سید علی ہاشم عابدی

لکھنو۔ حضرت امام علی رضا علیہ السلام کی شب شہادت مسجد کالا امام باڑہ پیر بخارہ میں بعد نماز مغربین مجلس عزا منعقد ہوئی۔ جسے مولانا سید علی ہاشم عابدی امام جماعت مسجد کالا امام باڑہ نے خطاب کیا۔

مولانا سید علی ہاشم عابدی نے رسول اللہ صلی اللہ علیہ وآلہ کی حدیث "عنقریب میرا پارہ جگر سرزمین خراسان پر دفن ہوگا، کوئی مومن اس کی زیارت نہیں کرے گا مگر یہ کہ اللہ اس پر جنت کو واجب اور اس کے بدن پر جہنم کی آگ کو حرام قرار دے گا۔” کو سر نامہ کلام قرار دیتے ہوئے کہا: 23 ذی القعدہ جہاں امام علی رضا علیہ السلام کا یوم شہادت ہے وہیں آپ کی زیارت کا مخصوص دن ہے۔ اس دن دنیا بھر سے زائرین امام علی رضا علیہ السلام کی زیارت کے لئے مشہد مقدس پہنچتے ہیں، کیونکہ آپ کی زیارت ایمان کی دلیل اور جنت کی ضمانت ہے۔

مولانا سید علی ہاشم عابدی نے امام جعفر صادق علیہ السلام کی حدیث "میرا پوتا سرزمین خراسان کے شہر طوس میں قتل ہوگا، جو بھی معرفت کے ساتھ اس کی زیارت کرے گا، میں قیامت کے دن اس کا ہاتھ پکڑ کر جنت میں داخل کروں گا۔” کو بیان کرتے ہوئے کہا: امام علی رضا علیہ السلام کے زائر کو خود امام جعفر صادق علیہ السلام جنت لے جائیں گے۔ ظاہر ہے جسے مالک جنت جنت لے جائے اسے جنت جانے سے کون روک سکتا ہے۔

مولانا سید علی ہاشم‌ عابدی نے روایت "امام محمد تقی علیہ السلام سے پوچھا گیا کہ جس نے آپ کے والد کی زیارت کی، اس کا اجر کیا ہے؟ فرمایا: خدا کی قسم! جنت ہے، خدا کی قسم! جنت ہے۔” بیان کرتے ہوئے فرمایا: اگر ہم معصومین علیہم السلام کی روایات میں غور کریں تو ہمارے لئے واضح ہو جائے گا کہ امام علی رضا علیہ السلام کے زائر کے جنتی ہونے کی ضمانت ائمہ معصومین علیہم السلام نے لی ہے۔

مولانا سید علی ہاشم عابدی نے امام موسی کاظم علیہ السلام کی حدیث "میرے فرزند علی (رضاؑ) کا زائر جنتی ہے۔” بیان کرتے ہوئے کہا: روایات میں امام علی رضا علیہ السلام کے روضہ مبارک کو "روضۃ من ریاض الجنۃ” یعنی جنت کے باغوں میں سے ایک باغ کہا گیا ہے۔ جس سے واضح ہوتا ہے کہ جو بھی امام علی رضا علیہ السلام کے روضہ مبارک میں داخل ہوا وہ باغ جنت میں داخل ہوا۔