ہندوستان میں سرکاری تعلیمی نظام پر دگ وجے سنگھ کی تشویش، ایک لاکھ اسکول بند ہونے کا دعویٰ

ہندوستان میں سرکاری تعلیمی نظام پر دگ وجے سنگھ کی تشویش، ایک لاکھ اسکول بند ہونے کا دعویٰ

نئی دہلی۔ کانگریس کے رہنما اور سابق مرکزی وزیر دگ وجے سنگھ نے ملک کے سرکاری تعلیمی نظام کی صورتحال پر تشویش کا اظہار کرتے ہوئے دعویٰ کیا ہے کہ گزشتہ برسوں میں تقریباً ایک لاکھ سرکاری اسکول بند ہو چکے ہیں جبکہ تقریباً 10 لاکھ اساتذہ کی آسامیاں خالی ہیں۔

دگ وجے سنگھ نے اپنے مضمون میں کہا کہ سرکاری اسکولوں کی تعداد میں کمی، اساتذہ کی قلت اور طلبہ کے داخلوں میں کمی سے تعلیمی معیار متاثر ہو رہا ہے۔ کانگریس جنرل سکریٹری جے رام رمیش نے بھی اس مضمون کو شیئر کرتے ہوئے حکومت پر الزام لگایا کہ سرکاری تعلیم کے شعبے کو کمزور کیا جا رہا ہے۔

انہوں نے کہا کہ سرکاری اسکولوں کی بندش کا سب سے زیادہ اثر غریب اور دیہی علاقوں کے طلبہ پر پڑے گا، جو نجی تعلیمی اداروں کے اخراجات برداشت نہیں کر سکتے۔ دگ وجے سنگھ نے حکومت سے سرکاری تعلیمی نظام کو مضبوط بنانے اور خالی اساتذہ کی آسامیوں کو پُر کرنے کا مطالبہ کیا۔