رسول خدا صلی اللہ علیہ وآلہ نے عام حالات میں کبھی بھی لوگوں کے اموال ضبط نہیں کئے: آیۃ اللہ العظمیٰ شیرازی

رسول خدا صلی اللہ علیہ وآلہ نے عام حالات میں کبھی بھی لوگوں کے اموال ضبط نہیں کئے: آیۃ اللہ العظمیٰ شیرازی

مرجع عالی قدر آیۃ اللہ العظمیٰ سید صادق حسینی شیرازی دام ظلہ کا روزانہ کا علمی جلسہ حسب دستور جمعرات 25 ربیع الاول 1447 ہجری کو منعقد ہوا۔ جس میں گذشتہ جلسات کی طرح حاضرین کے مختلف فقہی سوالات کے جوابات دیے گئے۔

آیت اللہ العظمیٰ شیرازی نے صدر اسلام میں لوگوں کے اموال کی ضبطی کے سلسلہ میں فرمایا: اگر تحقیق اور جستجو کی جائے تو یہ بات واضح ہو جائے گی کہ رسول خدا صلی اللہ علیہ وآلہ نے عام حالات میں کبھی بھی لوگوں کے اموال ضبط نہیں کئے۔

معظم لہ نے مزید فرمایا: صرف کفار سے، وہ بھی جنگی حالات میں بطور مال غنیمت انکے اموال کو لیا گیا۔

انہوں نے تاکید فرمائی: لیکن جو کفار حالتِ جنگ میں نہیں تھے، ان کا کبھی بھی مال ضبط نہیں کیا گیا۔

آیۃ اللہ العظمیٰ شیرازی نے مزید فرمایا: امیرالمؤمنین علیہ السلام نے بھی کبھی لوگوں کے اموال ضبط نہیں کئے، حتی ان تین جنگوں (جمل، صفین اور نہروان) میں بھی آپ نے اپنے مخالفین کے اموال ضبط نہیں کئے۔

واضح رہے کہ مرجع عالی قدر آیۃ اللہ العظمیٰ سید صادق حسینی شیرازی دام ظلہ کے یہ روزانہ علمی نشستیں قبل از ظہر منعقد ہوتی ہیں، جنہیں براہ راست امام حسین علیہ السلام سیٹلائٹ چینل کے ذریعے یا فروکوئنسی 12073 پر دیکھا جا سکتا ہے۔