کراچی میں یومِ شہادت علی علیہ السلام کے مرکزی جلوس کے لئے سیکیورٹی پلان جاری

کراچی پولیس نے یومِ شہادت علی علیہ السلام کے موقع پر مرکزی جلوس کی سیکیورٹی کے لئے فول پروف انتظامات کئے ہیں۔ جلوس کے روٹ اور اس سے متصل گزرگاہوں پر سیکیورٹی کے سخت اقدامات کئے گئے ہیں۔ مجموعی طور پر 5367 پولیس افسران اور جوان حفاظتی ڈیوٹی پر مامور ہیں جو ہر طرح کی ممکنہ صورتحال سے نمٹنے کے لئے تیار ہیں۔

سیکیورٹی ڈیوٹی پر مامور اہلکاروں میں 76 سینئر افسران، 725 این جی اوز، 3469 ہیڈ کانسٹیبل/کانسٹیبل، 137 خواتین پولیس اہلکار، اسپیشل برانچ کے 70 اہلکار شامل ہیں جبکہ ریپڈ ریسپانس فورس کے 75 اہلکار تعینات کئے گئے ہیں۔

مزید برآں 815 ٹریفک پولیس افسران و اہلکار مرکزی جلوس کے راستوں اور متبادل ٹریفک روٹس پر تعینات کئے گئے ہیں تاکہ ٹریفک کی روانی برقرار رہے اور شہریوں کو کسی قسم کی مشکلات کا سامنا نہ کرنا پڑے۔ داخلی اور خارجی راستوں پر واک تھرو گیٹس نصب کئے گئے ہیں جبکہ شرکاء کی جامع تلاشی کے لئے بم ڈسپوزل اسکواڈ اور اسپیشل برانچ کے اہلکار بھی تعینات ہیں۔

کسی بھی ہنگامی صورتحال کے پیش نظر ریسکیو اداروں اور ایمبولینس سروسز کو بھی الرٹ رکھا گیا ہے تاکہ فوری طبی امداد فراہم کی جا سکے۔ کراچی پولیس عوام سے گزارش کرتی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک سرگرمی یا غیر معمولی صورتحال کی فوری اطلاع مددگار 15 پر دیں۔ کراچی پولیس شہریوں کے جان و مال کے تحفظ اور امن و امان کی بحالی کے لئے اپنی ذمہ داریاں پوری کرتی رہے گی۔