بھارت کے دارالحکومت نئی دہلی میں اتوار کو حزبِ اختلاف کے اتحاد INDIA کی جانب سے احتجاجی مظاہرہ کیا گیا، جس میں ہزاروں افراد نے شرکت کی۔ رام لیلا میدان میں منعقدہ اس احتجاج کی قیادت کانگریس رہنما اور قائدِ حزبِ اختلاف راہل گاندھی نے کی۔
مظاہرین نے چیف الیکشن کمشنر گیانیش کمار کے استعفے اور ووٹر لسٹوں کی خصوصی نظرثانی (SIR) کے عمل میں شفافیت کا مطالبہ کیا۔ اپوزیشن جماعتوں نے الزام عائد کیا کہ اس عمل کے دوران بڑی تعداد میں ووٹروں کے نام حذف کئے گئے ہیں، جس سے شہریوں کے حقِ رائے دہی کے متاثر ہونے کا خدشہ ہے۔
دوسری جانب الیکشن کمیشن کا کہنا ہے کہ نظرثانی کا مقصد ووٹر لسٹوں کو درست اور شفاف بنانا ہے، جبکہ بی جے پی نے اپوزیشن کے احتجاج کو سیاسی سرگرمی قرار دیا ہے۔
احتجاج میں INDIA اتحاد کی مختلف جماعتوں کے رہنماؤں، کارکنوں اور نوجوانوں نے شرکت کی۔ مظاہرے کے پیش نظر دارالحکومت میں سکیورٹی کے سخت انتظامات کیے گئے اور بعض علاقوں میں ٹریفک کا نظام متاثر رہا۔
یہ احتجاج انتخابی فہرستوں کی نظرثانی، الیکشن کمیشن کی غیر جانب داری اور حقِ رائے دہی کے تحفظ سے متعلق بھارت میں جاری سیاسی بحث کی اہم کڑی ہے۔
