عالمی یومِ نوجوانان پر عالمی تنظیم فری مسلم کی نوجوانوں کو بااختیار بنانے، بے روزگاری سے نمٹنے اور امن کے فروغ کی اپیل

12 اگست کو عالمی یومِ نوجوانان کے موقع پر بین الاقوامی اداروں نے نوجوان نسل پر خصوصی توجہ دینے کی ضرورت پر زور دیا، کیونکہ نوجوان ایک ایسے مستقبل کی تعمیر کے بنیادی ستون ہیں جو امن اور انصاف پر مبنی ہو۔

اس سلسلہ میں حکومتوں کی جانب سے روزگار کے مواقع پیدا کرنے، سہولیات کو فروغ دینے اور نوجوانوں کو اہم فیصلہ سازی کے عمل میں شریک کرنے کے لئے عملی اقدامات کی خصوصی اہمیت ہے۔

شیعہ خبر رساں ایجنسی کے مطابق، اسی مناسبت سے عالمی تنظیم برائے نفیِ تشدد ’’فری مسلم‘‘ نے ایک بیان جاری کرتے ہوئے نوجوان نسل کو درپیش چیلنجز، بالخصوص بے روزگاری اور اسلامی ممالک میں نوجوانوں سے عدم توجہی کے مسئلے کے حل کے لئے ٹھوس اقدامات کا مطالبہ کیا۔

’’فری مسلم‘‘ نے معاشرے کی سلامتی پر بے روزگاری کے نتائج اور خطرات سے خبردار کرتے ہوئے جدید تعلیم اور ہنرمندی کی تربیت میں سرمایہ کاری کی اہمیت پر زور دیا۔

عالمی تنظیم برائے نفیِ تشدد ’’فری مسلم‘‘ نے نوجوانوں میں امن کی ثقافت کو فروغ دینے اور تشدد سے دوری کو انتہاپسندی کے مقابلے میں ایک مضبوط رکاوٹ قرار دیا اور تمام اداروں سے مطالبہ کیا کہ نوجوانوں کی ترقی اور ان کی جائز خواہشات کی تکمیل کے لئے محفوظ ماحول فراہم کیا جائے۔