آئرلینڈ کی مسلم کونسل کی اسلاموفوبیا اور نفرت انگیزی کے خطرناک نتائج سے خبردار کرنے والی شدید مذمت
آئرلینڈ کے دارالحکومت ڈبلن کے وسط میں ٹالبوٹ اسٹریٹ پر واقع اسلامی مرکز اور المدینہ ہال پر مشتبہ طور پر آتش زنی کا حملہ کیا گیا، جس کے نتیجے میں عبادت گاہ کو شدید نقصان پہنچا اور مذہبی اقلیتوں میں تشویش کی لہر دوڑ گئی۔
خوش قسمتی سے اس واقعہ میں کوئی جانی نقصان نہیں ہوا، کیونکہ بروقت عمارت خالی کرا لی گئی۔ یہ واقعہ ایسے وقت پیش آیا ہے جب گزشتہ کئی ہفتوں سے دائیں بازو کے انتہا پسند عناصر کی جانب سے نمازیوں کو ہراساں کرنے، دھمکانے اور خوفزدہ کرنے کے واقعات مسلسل سامنے آ رہے تھے۔
خبر رساں ادارہ اناطولی کے مطابق، آئرلینڈ کی پولیس نے اس واقعہ کی تحقیقات کے لئے خصوصی مجرمانہ تفتیش کا آغاز کر دیا ہے۔
اسی دوران خبر رساں ویب سائٹ فائیو پلرز نے رپورٹ کیا کہ آئرلینڈ کی مسلم کونسل نے ایک بیان جاری کرتے ہوئے اس دستی بم کے ذریعہ کئے گئے ہولناک حملے کی سخت ترین الفاظ میں مذمت کی ہے۔
بیان میں کہا گیا ہے کہ گزشتہ ہفتوں کے دوران نمازیوں کی غیر قانونی طور پر ویڈیوز اور تصاویر بنائی گئیں اور ان کے خلاف جھوٹا پروپیگنڈا کیا گیا۔ کونسل نے خبردار کیا کہ مسلمانوں کے خلاف اسلاموفوبیا، نفرت انگیزی اور اشتعال انگیز مہمات کو معمول بنانا انتہا پسند عناصر کو مزید پرتشدد کارروائیوں پر اکساتا ہے۔
مسلم کونسل آف آئرلینڈ نے اس عزم کا اعادہ کیا کہ وہ نفرت، تعصب اور تفرقہ انگیزی کے خلاف ڈٹ کر کھڑی رہے گی اور ملک میں مذہبی ہم آہنگی، باہمی احترام اور پُرامن بقائے باہمی کی اقدار کے فروغ کے لئے اپنی کوششیں جاری رکھے گی۔
