لبنان کے علاقے شویفات میں مجلسِ عزا؛ نمائندۂ آیت اللہ العظمیٰ شیرازی کا شعائرِ حسینی کے احیاء پر زور
لبنان کے علاقے شویفات میں مؤسسہ ”العیش والتکافل” سے وابستہ ہیئتِ حضرت ابوالفضل العباس علیہ السلام نے ماہِ محرم الحرام کے پروگراموں کے سلسلے میں ایک خصوصی مجلسِ عزا برپا کی۔
یہ مجلس تلاوتِ کلامِ پاک اور زیارتِ عاشورا کی قرائت سے شروع ہوئی اور مرجعِ عالیقدر آیت اللہ العظمیٰ سید صادق حسینی شیرازی کے نمائندے حجت الاسلام والمسلمین شیخ جلال معاش کی موجودگی میں منعقد ہوئی۔
حجت الاسلام والمسلمین معاش نے اپنے خطاب میں، خاص طور پر ماہِ محرم میں، شعائرِ حسینی کے احیاء کی اہمیت پر زور دیا اور موجودہ معاشی، سماجی، سیاسی اور سلامتی کے چیلنجوں کی طرف اشارہ کرتے ہوئے ان دینی شعائر کے تحفظ اور تقویت کی ضرورت پر تاکید فرمائی۔
انہوں نے ایمانی اخوت، عفو اور مؤمنین کے درمیان آشتی کے بلند مقام کا بھی ذکر کیا اور ماہِ محرم کو اصلاحِ نفس، دلوں کو کینے سے پاک کرنے اور برادرانہ تعلقات کو مضبوط کرنے کا سنہرا موقع قرار دیا۔ انہوں نے مؤمنین سے درخواست کی کہ روحِ عفو و گذشت کو فروغ دے کر خاندانی اور سماجی رشتوں کے استحکام کی راہ ہموار کریں۔
نمائندۂ آیت اللہ العظمیٰ شیرازی نے اپنے خطاب کے ایک اور حصے میں زیارتِ اربعینِ حضرت امام حسین علیہ السلام کی اہمیت پر خصوصی توجہ دلائی اور حضرت سیدالشہداء علیہ السلام کے عاشقان و دلدادگان سے گزارش کی کہ دشواریوں کے باوجود اس عظیم زیارت میں شرکت کے لیے منصوبہ بندی اور کوشش کریں۔
انہوں نے مضیفِ حضرت ابوالفضل العباس علیہ السلام کے خادمین کا شکریہ ادا کیا اور عزاداروں و زائرینِ حسینی کی خدمت کو ایک عظیم اعزاز اور قابلِ قدر سعادت قرار دیا۔
مجلس کے آگے کے حصے میں حجت الاسلام شیخ محمد حسین معاش نے مجلسِ سوگواری برپا کی۔ یہ پُرنور مجلس مرثیہ خوانی اور عزاداری کے ساتھ اہلِ بیت علیہم السلام کے غم و ارادت کی فضا میں اختتام پذیر ہوئی۔
