اقوامِ متحدہ کے سکریٹری جنرل نے علاقائی اور بین الاقوامی سطح پر درپیش پیچیدہ چیلنجز کے مقابلے کے لئے اقوامِ متحدہ اور افریقی یونین کے درمیان مشترکہ تعاون کو مزید مضبوط بنانے کی ضرورت پر زور دیا ہے۔
رائٹرز کے مطابق، انتونیو گوٹیرس نے اعلان کیا کہ اقوامِ متحدہ اور افریقی یونین کے درمیان ایک مشترکہ اعلامیے پر دستخط کئے گئے ہیں، جس کے ذریعہ دونوں فریقوں نے امن و سلامتی، انسانی حقوق اور پائیدار ترقی کے شعبوں میں تعاون کو وسعت دینے کے اپنے عزم کی تجدید کی ہے۔
انہوں نے اس اشتراک کو بین الاقوامی اقدامات میں بہتر ہم آہنگی کے لئے ایک اہم فریم ورک قرار دیا۔
انہوں نے مزید کہا کہ یہ شراکت خصوصاً افریقی براعظم میں سلامتی کے بحرانوں سے نمٹنے میں مؤثر کردار ادا کر سکتی ہے اور عالمی چیلنجز کے مقابلے میں مربوط اور منظم ردِعمل کی راہ ہموار کرے گی۔
اقوامِ متحدہ کے سکریٹری جنرل نے بڑھتے ہوئے انسانی بحرانوں، موسمیاتی تبدیلیوں اور دنیا کے بعض خطوں میں پھیلتی ہوئی بدامنی کا ذکر کرتے ہوئے علاقائی اور بین الاقوامی اداروں کے درمیان مزید ہم آہنگی پر زور دیا۔ ان کا کہنا تھا کہ اجتماعی تعاون کے بغیر ان چیلنجز کا حل ممکن نہیں۔
اعلامیہ کے مطابق، دونوں اداروں کے درمیان قریبی تعاون کا سلسلہ مستقبل میں بھی ترجیحات میں شامل رہے گا۔
