امریکہ، میکسیکو اور کینیڈا میں 2026 کے عالمی کپ کے انسانی حقوق پر ممکنہ اثرات کے بارے میں انسانی حقوق کی تنظیم کا انتباہ
انسانی حقوق کی بین الاقوامی تنظیم ہیومن رائٹس واچ نے 2026 کے فٹبال عالمی کپ کے انعقاد کے حوالے سے انسانی حقوق سے متعلق شدید خدشات کا اظہار کرتے ہوئے خبردار کیا ہے کہ یہ عالمی مقابلے انسانی حقوق کے اعتبار سے حساس اور خطرناک صورتِ حال پیدا کر سکتے ہیں۔
یہ مقابلے مشترکہ طور پر امریکہ، میکسیکو اور کینیڈا میں منعقد ہوں گے۔
جرمن نشریاتی ادارے ڈوئچے ویلے کی رپورٹ کے مطابق، ہیومن رائٹس واچ کے عالمی اقدامات کے شعبے کے ڈائریکٹر نے کہا ہے کہ اگرچہ یہ مقابلے کھیلوں کی دنیا میں غیر معمولی اہمیت رکھتے ہیں، لیکن ان کے انعقاد کے دوران انسانی حقوق کی صورتحال کے بارے میں سنجیدہ سوالات اور خدشات موجود ہیں۔
رپورٹ میں اس بات کی طرف اشارہ کیا گیا ہے کہ امریکی امیگریشن ادارے ممکنہ طور پر اس عالمی ایونٹ کی سکیورٹی میں اہم کردار ادا کریں گے، جبکہ امریکہ کی سخت گیر امیگریشن پالیسیاں پہلے ہی انسانی حقوق کے کارکنوں اور عالمی مبصرین کے لئے تشویش کا باعث بنی ہوئی ہیں۔
ماہرین کے مطابق ان پالیسیوں کے اثرات شائقین، تارکینِ وطن اور بعض مخصوص طبقات پر پڑ سکتے ہیں۔
مزید رپورٹ میں کہا گیا ہے کہ بعض میزبان شہروں میں انسانی حقوق کے تحفظ کے لئے جامع اور واضح منصوبہ بندی موجود نہیں ہے۔
اسی طرح عالمی فٹبال تنظیم فیفا کے کردار اور ذمہ داریوں کے بارے میں بھی مختلف حلقوں میں اختلافِ رائے پایا جاتا ہے، جس کے باعث اس عالمی ایونٹ کے دوران انسانی حقوق کے مسائل بین الاقوامی سطح پر وسیع بحث اور تنقید کا موضوع بن سکتے ہیں۔
