ہندوستان: سنبھل میں عیدگاہ و امام باڑہ کی مسماری پر مقامی مسلمانوں میں تشویش، انتظامیہ کا تجاوزات قرار دینے کا دعویٰ
ہندوستان: سنبھل میں عیدگاہ و امام باڑہ کی مسماری پر مقامی مسلمانوں میں تشویش، انتظامیہ کا تجاوزات قرار دینے کا دعویٰ
اترپردیش کے ضلع سنبھل میں بچھولی گاؤں میں واقع عیدگاہ اور امام باڑہ کو انتظامیہ کی جانب سے مسمار کئے جانے کے بعد مقامی مسلمانوں میں گہری تشویش اور بے چینی پائی جا رہی ہے۔ یہ کارروائی محکمہ ریونیو کے احکامات پر عمل کرتے ہوئے انجام دی گئی۔
سب ڈویژنل مجسٹریٹ ندھی پٹیل کے مطابق متعلقہ زمین سرکاری ریکارڈ میں درج تھی اور اس پر غیر قانونی طور پر مذہبی ڈھانچے تعمیر کئے گئے تھے، جس کے بعد تحصیلدار عدالت نے بے دخلی کے احکامات جاری کئے۔
دوسری جانب مقامی افراد کا کہنا ہے کہ یہ مذہبی مقامات طویل عرصے سے استعمال میں تھے، اور ان کی اچانک مسماری نے علاقے میں اضطراب پیدا کر دیا ہے۔ کارروائی کے دوران بھاری پولیس فورس کی تعیناتی نے علاقے کو عملی طور پر چھاؤنی میں تبدیل کر دیا تھا۔
یہ واقعہ ایک ایسے وقت میں پیش آیا ہے جب ضلع سنبھل پہلے ہی زمین اور مذہبی ڈھانچوں سے متعلق تنازعات کی وجہ سے حساس صورتحال سے گزر رہا ہے، جس پر مختلف حلقوں کی جانب سے تشویش کا اظہار کیا جا رہا ہے۔
