اسکاٹ لینڈ میں 1100 سے زائد جنرل پریکٹشنر ڈاکڑز وقت سے پہلے ہی ریٹائرمنٹ لے رہے ہیں، صرف 25 ڈاکٹرز نے اسٹیٹ ریٹائرمنٹ کی عمر 66 سال تک پہنچنے کا انتطار کیا۔
اعداد و شمار سے پتہ چلتا ہے کہ اسکاٹ لینڈ میں جی پی ڈاکٹرز کی تعداد مسلسل کم ہوتی جا رہی ہے۔ 2024 کےجنرل پریکٹس ورک فورس کے سروے سے پتہ چلتا ہے کہ کام کی زیادتی کے باعث بہت سے ڈاکٹر زیادہ تھکن کا شکار ہو رہے ہیں اور ان کی ایک بڑی تعداد اب بیماریوں کی زیادہ چھٹیاں لے رہی ہے۔
31 مارچ 2024 کے ختم ہونے والے سال میں جی پی ڈاکٹرز کے 5500 سیشن ضائع ہوئے۔ جو کہ اس سے پہلے کے سال سے 15 فیصد زیادہ ہے۔
لبرل ڈیموکریٹ پارٹی کے ممبر پارلیمنٹ الیکس کول ہملٹن نے کہا کہ حکومت کو چاہیے کہ وہ ڈاکٹروں کی مدد کےلئے فارمیسی، فزیوتھراپی اور مینٹل ہیلھ کے ماہرین کو بھرتی کرے۔ اس سے جی پی ڈاکٹرز پر کام کا بوجھ کم ہو گا۔
ڈاکٹروں کے جلد ریٹائر ہونے کی وجہ سے لوگوں کو ان سے اپائنٹمنٹ لینے میں شدید دشواریوں کا سامنا ہے اور بار بار فون کرنے کے باوجود وقت نہیں مل پاتا۔
ان کا کہنا تھا کہ وہ حکومت سے مطالبہ کرتے ہیں کہ وہ ایک ہزار مریضوں کے لئے ایک ڈاکٹر کا بندوبست کرے۔
اسکاٹش حکومت کے ایک ترجمان کا کہنا ہے کہ ہم 2027 تک مزید 700 جی پی ڈاکٹروں کا اضافہ کرنے کے لئے پر عزم ہیں، اس وقت بھی ہمارے پاس انگلینڈ کے مقابلے میں فی کس ڈاکٹروں کی تعداد زیادہ ہے۔
