نجف اشرف میں عید غدیر کی پُرشکوہ تقریبات — ہزاروں زائرین کی امام علی بن ابی طالب علیہ السلام سے تجدیدِ بیعت
نجف اشرف میں واقع روضہ مقدسِ امیرالمؤمنین حضرت علی بن ابی طالب علیہ السلام میں عید غدیر کے پُرمسرت موقع پر عراق اور بیرونِ ملک سے آئے ہوئے ہزاروں زائرین کی کثیر تعداد نے شرکت کی، تاکہ 18 ذوالحجہ کی عظیم اسلامی مناسبت پر تجدیدِ بیعت کر سکیں۔ یہ وہی دن ہے جس میں رسولِ اکرم حضرت محمد مصطفی صلی اللہ علیہ وآلہ وسلم نے حضرت علی بن ابی طالب علیہ السلام کو اپنی جانشینی اور وصایت کے لیے مقرر فرمایا تھا۔
شیعہ نیوز ایجنسی کے نمائندے نے اطلاع دی کہ اس پُروقار تقریب کے دوران روضہ مقدس کے صحن اور اطراف خوشی، محبت اور عقیدت کے مناظر سے معمور تھے۔ حرمِ علوی کے انتظامیہ، مقامی حکام اور خدمت گزار اداروں نے زائرین کی سہولت کے لیے اعلیٰ درجے کے سیکیورٹی، ٹریفک اور خدماتی انتظامات کیے۔ صبح سویرے سے ہی شہر کی سڑکوں پر غیر معمولی ہجوم نظر آیا۔
زائرین نے اس دن کی روحانی عظمت اور معنوی اہمیت پر روشنی ڈالتے ہوئے کہا کہ عید غدیر دراصل اہل بیت علیہم السلام سے وفاداری، ولایت اور محبت کی تجدید کا دن ہے۔ ان کے مطابق، یہی وہ دن ہے جس میں دین اسلام مکمل ہوا اور اللہ سبحانہ وتعالیٰ کی طرف سے نعمت تمام ہوئی، جیسا کہ قرآن کریم میں ارشادِ باری تعالیٰ ہے:
"اَلیَومَ أَکمَلتُ لَکم دینَکم وَأَتمَمتُ عَلَیکم نِعمَتی وَرَضیتُ لَکمُ الإسلامَ دینًا”
سورۃ المائدہ، آیت 3
آج میں نے تمہارے لیے تمہارا دین کامل کر دیا اور تم پر اپنی نعمت پوری کر دی، اور میں نے تمہارے لیے اسلام کو دین کے طور پر پسند کر لیا۔”
تقریب میں موجود مختلف زائرین اور علماء کرام نے نوجوان نسل پر زور دیا کہ وہ اس دن کی تاریخی اور عقیدتی اہمیت کو سمجھیں، کیونکہ عید غدیر صرف ایک جشن نہیں بلکہ اسلام کے اس اصول کی یاد دہانی ہے جس پر امامت و ولایت کی بنیاد رکھی گئی۔
