پاکستان میں پولیو کا نیا کیس، مجموعی تعداد 71 ہوگئی

صوبہ سندھ کے ضلع جیکب آباد سے پولیو کا ایک نیا کیس رپورٹ ہوا ہے، جس کے بعد 2024 میں ملک بھر میں متاثرہ بچوں کی تعداد 71 تک پہنچ گئی۔ قومی ادارہ صحت کے مطابق متاثرہ بچے کا نمونہ 27 دسمبر 2024 کو لیا گیا تھا۔

2024 میں پولیو کے 71 کیسز میں سے 27 بلوچستان، 21 خیبرپختونخوا، 21 سندھ، اور ایک ایک کیس پنجاب اور اسلام آباد سے رپورٹ ہوا۔ جیکب آباد سے گزشتہ سال پولیو کے 5 کیسز سامنے آئے۔

رواں سال کی پہلی پولیو مہم 3 سے 9 فروری 2025 تک جاری رہے گی، جس میں والدین سے 5 سال سے کم عمر کے بچوں کو پولیو کے قطرے پلانے کی اپیل کی گئی ہے۔ پولیو ایک مفلوج کرنے والی بیماری ہے، جس کا علاج نہیں، لیکن ویکسین بچوں کو محفوظ بناتی ہے۔

گزشتہ سال کا آخری کیس کراچی سے رپورٹ ہوا تھا، جس کے بعد تعداد 70 تھی۔