فرانس میں طلبہ احتجاج، 51 یونیورسٹیز اور متعدد اسکول متاثر
فرانس میں طلبہ احتجاج، 51 یونیورسٹیز اور متعدد اسکول متاثر
فرانس میں طلبہ تنظیموں کی احتجاجی اپیل کے بعد ملک بھر میں متعدد ہائی اسکولوں اور یونیورسٹیز میں تعلیمی سرگرمیاں متاثر ہوئیں، جبکہ ہزاروں طلبہ اور دیگر مظاہرین کے سڑکوں پر نکلنے کی توقع ہے۔
پیرس پولیس کے مطابق 15 ہزار سے 30 ہزار افراد احتجاج میں شریک ہو سکتے ہیں۔ وزارتِ اعلیٰ تعلیم نے بتایا کہ منگل کی صبح 184 میں سے 51 اعلیٰ تعلیمی ادارے متاثر ہوئے، جبکہ وزارتِ تعلیم کے مطابق 48 ہائی اسکولوں میں احتجاجی سرگرمیاں ہوئیں۔ طلبہ یونینوں نے اس سے کہیں زیادہ اداروں کے متاثر ہونے کا دعویٰ کیا ہے۔
لیون میں حکام کے مطابق 900 افراد نے مظاہرے میں شرکت کی، جبکہ طلبہ تنظیموں نے تعداد 1,500 بتائی۔ مختلف مقامات پر توڑ پھوڑ اور آتش زنی کے واقعات کے سلسلے میں گرفتاریاں بھی ہوئیں۔
پیرس میں انتظامیہ نے حفاظتی وجوہات کی بنا پر احتجاج کے اصل راستے پر پابندی عائد کردی، جسے انتظامی عدالت نے برقرار رکھا اور مظاہرین کے لیے متبادل راستے کی اجازت دی۔ دریں اثنا، ایک سرکاری ملازمین کی یونین نے 5 نومبر کو ملک گیر ہڑتال اور احتجاج کی اپیل بھی کی ہے۔
