نجف اشرف میں امام علی علیہ السلام پبلک لائبریری علمی ورثے کا درخشاں خزانہ

نجف اشرف کے تاریخی محلہ الحویش کے قلب میں واقع حضرت امام علی علیہ السلام پبلک لائبریری ایک نمایاں ثقافتی و تحقیقی ادارے کے طور پر مکتب تشیع کے فکری ورثے کے تحفظ میں کلیدی کردار ادا کر رہی ہے۔

یہ علمی مرکز نامور محقق علامہ شیخ عبدالحسین امینی قدس سرہ کی انتھک کوششوں سے قائم ہوا اور ہمیشہ سے محققین اور حوزہ علمیہ کے طلاب کے لیے ایک علمی پناہ گاہ بنا ہوا ہے۔

شیعہ نیوز ایجنسی کی رپورٹ کے مطابق یہ آزاد فکری مرکز جو 1957ء میں عید غدیر کے مبارک موقع پر قائم ہوا تھا، مختلف زبانوں میں ہزاروں مطبوعہ کتب اور قدیم مجلات کے نادر ذخیرے پر مشتمل ہے۔

مزید برآں، پانچ ہزار سے زائد نفیس قلمی نسخوں اور قدیم قرآن کریم کے نسخوں کی حفاظت نے اس لائبریری کو قدیم و نایاب متون کے سب سے غنی خزانوں میں سے ایک بنا دیا ہے۔

حالیہ برسوں میں ڈیجیٹل نظام اور جدید تخصصی لیبارٹریوں کے قیام کے بعد ان قیمتی اسلامی آثار کی مرمت اور حفاظت نہایت باریک بینی اور جدید تقاضوں کے مطابق جاری ہے۔