امیرِ کویت کا نئے شہریوں کا حقِ رائے دہی مکمل طور پر ختم کرنے اور شہریت سے متعلق قانونی پابندیاں سخت کرنے کا فرمان

کویت حکومت کی جانب سے نئے شہریوں کے حوالے سے حالیہ اقدامات نے ملک میں سیاسی اور قانونی پابندیوں کے ایک نئے دور کو جنم دیا ہے۔

نئی ترامیم کے مطابق جن افراد نے کویت کی شہریت حاصل کی ہے، وہ اب انتخابی عمل میں حصہ نہیں لے سکیں گے۔

کویت کی سرکاری خبر رساں ایجنسی کونا کے مطابق، امیرِ کویت نے فرمان جاری کرتے ہوئے قانونِ شہریت کی دفعہ 7 میں ترمیم کی ہے، جس کے تحت نئے شہریوں سے ووٹ دینے، انتخابات میں امیدوار بننے اور پارلیمانی اداروں میں تقرری کے حقوق واپس لے لیے گئے ہیں۔

یہ فیصلہ کویت میں دسیوں ہزار افراد کی شہریت منسوخ کرنے کی جاری وسیع مہم کے پس منظر میں سامنے آیا ہے۔