افغانستان کے دارالحکومت کابل میں مرجعِ عالی قدر آیۃ اللہ العظمیٰ سید صادق حسینی شیرازی کے دفتر میں محرم و صفر کے مقدس ایام کے دوران اہلِ بیتِ اطہار علیہم السلام سے توسل کی ہفتہ وار مجالس کا اہتمام کیا گیا۔
ان مجالس میں علماء، طلابِ علومِ دینیہ اور مؤمنین کی بڑی تعداد نے شرکت کی۔ پروگرام کا آغاز تلاوتِ قرآنِ کریم سے ہوا، جس کے بعد اہلِ بیتِ عصمت و طہارت علیہم السلام کی یاد میں مرثیہ و نوحہ خوانی کی گئی۔
مجالس عزا سے خطاب کرتے ہوئے حجۃ الاسلام ذاکری نے "قرآنِ کریم کی روشنی میں جنتی خاندان” کے موضوع پر گفتگو کی۔ انہوں نے قرآنی آیات کی روشنی میں مثالی اسلامی خاندان کی خصوصیات بیان کیں اور واضح کیا کہ صالح اور دینی بنیادوں پر استوار خاندان ہی انسان کی دنیا و آخرت کی کامیابی کا ذریعہ بنتا ہے۔
اسی سلسلہ میں کابل میں واقع آیۃ اللہ العظمیٰ سید صادق حسینی شیرازی سے وابستہ حضرت فاطمہ زہرا سلام اللہ علیہا کمپلیکس میں بھی ایام محرم و صفر کے دوران مجالسِ عزاء منعقد کی گئیں۔ ان پروگراموں کا آغاز تلاوتِ قرآنِ کریم سے ہوا، جس کے بعد نوحہ و مرثیہ خوانی پیش کی گئی۔
بعد ازاں حجۃ الاسلام حسینی نے اپنے خطاب میں اسلام کی نظر میں خاندانی تربیت کی اہمیت پر روشنی ڈالی۔ انہوں نے سیرتِ نورانی امام حسین علیہ السلام کو نمونۂ عمل قرار دیتے ہوئے بیان کیا کہ آپؑ نے انسان سازی، مؤمن افراد کی تربیت اور معاشرے میں اخلاقی و معنوی اقدار کے فروغ کے لئے بے مثال کردار ادا فرمایا۔
