کربلا میں مستحق خاندانوں کی مدد کے لئے مؤسسۂ مصباح الحسین علیہ السلام کا انسان دوست اقدام
شہرِ مقدس کربلا میں قائم ثقافتی و فلاحی مؤسسۂ مصباح الحسین علیہ السلام نے مرجعِ عالی قدر آیۃ اللہ العظمیٰ سید صادق حسینی شیرازی کی ان ہدایات کی روشنی میں، جن میں ضرورت مندوں اور یتیموں کی خصوصی سرپرستی پر زور دیا گیا ہے، دو مستحق اور باعزت خاندانوں کی فوری امداد کا اہتمام کیا۔
شیعہ خبر رساں ایجنسی کے مطابق، گرمیوں کے موسم میں درجۂ حرارت میں شدید اضافہ کے پیشِ نظر، مؤسسہ نے ایک یتیم خاندان اور ایک ضرورت مند خاندان کے لئے ضروری گھریلو سامان فراہم کرنے کی ذمہ داری اٹھائی۔
اس حوالے سے مؤسسہ کے فیلڈ کوآرڈینیٹر بہاء العابدی نے بتایا: "دو خاندانوں کی گھریلو ضروریات کے بارے میں اطلاعات موصول ہونے کے بعد معلوم ہوا کہ انہیں ریفریجریٹر سمیت بعض بنیادی گھریلو اشیاء کی شدید ضرورت ہے، تاکہ خوراک کو محفوظ رکھا جا سکے اور ٹھنڈے پانی کی سہولت میسر آ سکے۔ چنانچہ مؤسسہ کی انتظامیہ کے تعاون سے مطلوبہ سامان خرید کر براہِ راست ان کے گھروں تک پہنچایا گیا، تاکہ شدید گرمی کے ان دنوں میں ان کی مشکلات میں کچھ کمی لائی جا سکے۔”
انہوں نے مزید کہا کہ یہ اقدام معاشرے کے کمزور اور محروم طبقات کی مدد کے سلسلہ کی ایک کڑی ہے، جس کا مقصد ضرورت مند خاندانوں کی بنیادی ضروریات پوری کرنا اور ان کی زندگی میں آسانی پیدا کرنا ہے۔
بہاء العابدی نے گفتگو کے اختتام پر مؤسسہ کی انتظامیہ، مخیر حضرات اور تمام معاونین کا شکریہ ادا کیا، جن کے تعاون سے مختلف فلاحی اور انسانی خدمت کے منصوبہ جاری ہیں۔ انہوں نے اہلِ خیر سے اپیل کی کہ وہ اپنی مخلصانہ حمایت جاری رکھیں تاکہ مزید مستحق اور محروم خاندانوں تک امداد پہنچائی جا سکے۔
