کرگل: حسینی پارک کرگل میں مجلسِ عزاء کا انعقاد کیا گیا، جس میں کرگل اور نواحی علاقوں سے سیکڑوں عقیدت مند مرد و خواتین نے شرکت کی۔
مجلس کا آغاز حضرت امام حسین علیہ السلام اور شہدائے کربلا کی عظیم قربانیوں کی یاد میں کیا گیا۔ اس موقع پر سید کاظم صابری اور شیخ حسین رئیسی نے خطاب کرتے ہوئے واقعۂ کربلا کے پیغام اور امام حسین علیہ السلام کے مقصدِ قیام پر روشنی ڈالی۔
مقررین نے کہا کہ کربلا حق و باطل کے درمیان ایک ابدی معرکہ ہے جو انسانیت کو عدل، حق گوئی، ظلم کے خلاف استقامت اور مشکلات میں ثابت قدمی کا درس دیتا ہے۔ انہوں نے حاضرین پر زور دیا کہ وہ اپنی انفرادی اور اجتماعی زندگی میں امام حسین علیہ السلام کی تعلیمات کو اپنائیں۔
انہوں نے مزید کہا کہ تحریکِ کربلا آج بھی امتِ مسلمہ کے لیے ہدایت کا سرچشمہ ہے اور اس کے اصولوں پر عمل کرکے معاشرے میں سچائی، انصاف، عزتِ نفس اور سماجی ذمہ داری کو فروغ دیا جا سکتا ہے۔
مجلس کے اختتام پر عالمِ انسانیت کے امن، انصاف اور فلاح و بہبود کے لیے خصوصی دعائیں کی گئیں۔
