ترکی کے شہر استنبول میں اہلِ بیت علیہم السلام کے شعائر کی تعظیم و ترویج کے سلسلے میں ایک تاریخی اور شاندار تقریب منعقد ہوئی۔
ترکی کی علوی برادری کے درمیان مذہبِ حقہ کے احیاء اور ثقافتِ غدیر کے فروغ کے لئے پہلی عظیم الشان کانفرنس "جمعیتِ علویان” اور "عالمی نیٹ ورک الزہراء سلام اللہ علیہا” کے باہمی تعاون سے منعقد کی گئی۔
اس روحانی اور فکری اجتماع میں ممتاز دینی، ثقافتی اور میڈیا شخصیات کے علاوہ مکتبِ جعفریہ اور اہلِ سنت کے نمائندوں نے بھی بھرپور شرکت کی۔
مقررین نے پیغامِ غدیر کی اشاعت اور اسلامی وحدت و ہم آہنگی کے فروغ کی اہمیت پر زور دیا۔
شیعہ خبر رساں ایجنسی کے مطابق، آیۃ اللہ العظمیٰ سید صادق حسینی شیرازی کے نمائندہ حجۃ الاسلام والمسلمین شیخ جلال معاش نے اس اجتماع میں بطورِ مہمانِ خصوصی خطاب کیا۔
انہوں نے آیۃ اللہ العظمیٰ شیرازی کا پیغام حاضرین تک پہنچاتے ہوئے کہا کہ غدیر کے انسانی، اخلاقی اور اصلاحی پیغامات کو پوری انسانیت تک پہنچانا ایک عظیم دینی اور ثقافتی ذمہ داری ہے۔
رپورٹ کے مطابق، ممتاز دانشوروں اور علمی شخصیات، جن میں پروفیسر احمد کبکجی، پروفیسر فاضل آغیش، سید تزل ددہ، غازی کارابابا ددہ اور سید علی ہدی ددہ شامل تھے، نے بھی اپنے خطابات میں رسولِ اکرم صلی اللہ علیہ وآلہ وسلم کے بعد امیرالمؤمنین امام علی علیہ السلام کی ولایت و امامت کے مقام پر روشنی ڈالی۔
انہوں نے اس بات پر زور دیا کہ جدید ذرائع ابلاغ اور میڈیا سے استفادہ کرتے ہوئے پیغامِ غدیر کو وسیع پیمانے پر دنیا تک پہنچایا جائے۔
