دنیا بھر میں شیعہ مسلمانوں کے حقوق کی ماہانہ خلاف ورزیوں کی رپورٹ
جبری اخراج اور وسیع پیمانے پر گرفتاریوں سے لے کر مذہبی مقامات پر حملوں تک
ایک تازہ رپورٹ میں مختلف ممالک میں شیعہ مسلمانوں کی انسانی حقوق کی صورتِ حال پر روشنی ڈالی گئی ہے، جس کے مطابق گزشتہ ہفتوں کے دوران گرفتاریوں، جبری اخراج، عبادت گاہوں پر حملوں، قتل، اغوا اور سخت عدالتی سزاؤں کے متعدد واقعات ریکارڈ کئے گئے ہیں۔
شیعہ نیوز ایجنسی کی رپورٹ کے مطابق، عالمی شیعہ حقوق مانیٹرنگ تنظیم (شیعہ رائٹس واچ) نے اپنی ماہانہ رپورٹ میں کہا ہے کہ یہ واقعات خصوصی ذرائع اور انسانی حقوق کے کارکنوں کے نیٹ ورک کی معلومات کی بنیاد پر جمع کئے گئے ہیں، جبکہ وہ کیسز جن کے بارے میں کافی شواہد موجود نہیں تھے، انہیں حتمی رپورٹ میں شامل نہیں کیا گیا۔
رپورٹ میں ہزاروں پاکستانی نژاد شیعہ خاندانوں کی متحدہ عرب امارات سے جبری بے دخلی، افغانستان میں شیعہ علماء پر دباؤ، پاکستان میں شیعہ آبادی پر سکیورٹی کارروائیوں اور دھماکوں کے حملوں، اور بحرین میں گرفتاریوں اور عدالتی سزاؤں میں اضافے کا ذکر کیا گیا ہے۔
اسی طرح شام کی صورتحال کو رپورٹ کا سب سے تشویشناک حصہ قرار دیا گیا ہے، جہاں ماورائے عدالت قتل، گرفتاریاں، تشدد، مذہبی مقامات کی مسماری اور رہائشیوں کی جبری بے دخلی کے واقعات رپورٹ ہوئے ہیں۔
تنظیم نے آخر میں بین الاقوامی اداروں سے مطالبہ کیا ہے کہ وہ مذہبی آزادی اور اقلیتی برادریوں کے حقوق کے تحفظ کے لئے فوری اقدامات کریں۔
