3 ذی القعدہ؛ یومِ وفاتِ آیۃ اللہ سید محمد الفشارکی اصفہانی رحمۃ اللہ علیہ

آیۃ اللہ سید محمد بن میر قاسم الطباطبائی الفشارکی اصفہانی رحمۃ اللہ علیہ علم و فقاہت کی دنیا کی ایک بلند پایہ شخصیت تھے، جنہوں نے اپنی پوری زندگی دینِ اسلام کی خدمت، تدریس اور تربیتِ شاگردان میں گزاری۔ آپ نے نجف اشرف اور سامرہ جیسے علمی مراکز میں نہ صرف خود اعلیٰ تعلیم حاصل کی بلکہ بے شمار جید علماء اور مجتہدین کی تربیت بھی کی، جو بعد میں دینی معاشرہ میں نمایاں مقام پر فائز ہوئے۔

آپ کی علمی گہرائی، باریک بینی اور تحقیق کا انداز آپ کو اپنے دور کے ممتاز فقہاء میں شامل کرتا ہے۔ اکابر علماء نے آپ کو ایک عظیم محقق، استادِ علماء اور اصول و فقہ کے ستون کے طور پر یاد کیا ہے۔ آپ کی شخصیت علم کے ساتھ ساتھ عمل، تقویٰ اور اخلاقِ حسنہ کا حسین امتزاج تھی۔ اہلِ بیت علیہم السلام کی محبت، مجالسِ عزا میں شرکت اور دینی شعائر کی ترویج آپ کی زندگی کا اہم حصہ تھے۔

آپ کی زندگی کا ایک نمایاں پہلو لوگوں کی رہنمائی اور مشکلات میں ان کی مدد کرنا تھا۔ سامرہ میں طاعون کی وبا کے دوران آپ کی ہدایت پر زیارتِ عاشورا کی اجتماعی تلاوت نے لوگوں کے دلوں میں امید پیدا کی اور اسے ایک روحانی سہارا سمجھا گیا۔ اس واقعہ نے آپ کی روحانی عظمت اور عوامی اثر و رسوخ کو مزید واضح کیا۔

آپ نے متعدد علمی رسائل تصنیف کئے، جو آج بھی فقہ و اصول کے طلبہ کے لئے مفید ہیں۔ آپ کی علمی میراث اور شاگردوں کی صورت میں چھوڑی گئی خدمات آج بھی دینی حلقوں میں زندہ ہیں۔

آپؒ نے 3 ذی القعدہ 1316 ہجری کو نجف اشرف میں وفات پائی، مگر آپ کی علمی و روحانی خدمات ہمیشہ یاد رکھی جائیں گی۔

یومِ وفات کے موقع پر ہم ان کی دینی خدمات کو خراجِ عقیدت پیش کرتے ہیں اور ان کے بلندی درجات کے لئے دعا گو ہیں۔ نیز اہل ایمان سے ان کے علوئے درجات کے لئے سورہ فاتحہ کی گزارش کرتے ہیں۔