اوڈیشہ میں لینڈ سلائڈ کا المناک حادثہ، حفاظتی کوتاہی سے 3 مزدوروں کی موت
اوڈیشہ میں لینڈ سلائڈ کا المناک حادثہ، حفاظتی کوتاہی سے 3 مزدوروں کی موت
اوڈیشہ میں کانکنی کے دوران لینڈ سلائڈ سے 3 مزدوروں کی موت ہو گئی۔ ابتدائی تفتیش میں غیر قانونی کانکنی اور حفاظتی اصولوں کی خلاف ورزی کی تصدیق ہوئی ہے، ٹھیکہ داروں پر کارروائی کی توقع ہے
اوڈیشہ کے کیونجھر ضلع میں منگل کو دیر شام ایک دل دہلا دینے والا واقعہ پیش آیا۔ یہاں بیترنی ریزرو فاریسٹ ایریا میں میگنیز کی کان میں کام چل رہا تھا، اسی دوران اچانک لینڈ سلائڈ ہو گیا جس میں تین مزدوروں کی دب کر موقع پر ہی موت ہو گئی۔ مہلوکین کی شناخت سندیپ مورتی، گرو چمپیا اور کانڈے منڈا کی شکل میں ہوئی ہے۔ تینوں مزدور بچکنڈی علاقے کے رہنے والے تھے اور اس وقت کان میں کانکنی کام کر رہے تھے۔
ابتدائی خبروں کے مطابق مزدور جیسے ہی کھدائی کام میں لگے، اچانک اوپر سے مٹی اور پتھروں کا بھاری لینڈ سلائڈ ہوا، جس میں وہ تینوں مزدور دب گئے اور جائے حادثہ پر ہی ان کی موت ہو گئی۔ واقعہ کے فوراً بعد مقامی لوگوں نے شور مچایا، جس کے بعد پولیس اور محکمہ جنگلات کی ٹیم موقع پر پہنچی۔ فوری طور پر راحت و بچاؤ مہم شروع کی گئی جس میں مشینوں اور اہلکاروں کی مدد سے ملبہ ہٹانے کا کام کیا گیا۔ تقریباً 6 گھنٹے کے ریسکیو آپریشن کے بعد تینوں مزدور کی لاش کو ملبہ سے باہر نکالا گیا۔
مہلوکین کی لاش کو پوسٹ مارٹم کے لیے بھیج دیا گیا ہے اور پولیس نے واقعہ کی جانچ شروع کر دی ہے۔ ابتدائی جانچ میں یہ بات سامنے آئی ہے کہ کانکنی کام کے دوران حفاظتی معیارات پر عمل نہیں کیا گیا تھا، جس سے یہ حادثہ ہوا۔ مقامی لوگوں نے بتایا کہ اس علاقے میں اکثر غیر اختیاری طور پر کانکنی ہوتی رہی ہے اور انتظامیہ اس پر خاموشی اختیار کیے رہتا ہے۔ اس حادثہ کے بعد دیہی لوگوں میں زبردست غم و غصے کا ماحول ہے۔ انہوں نے قصورواروں پر سخت کارروائی کا مطالبہ کیا ہے۔
محکمہ جنگلات اور پولیس افسروں نے بتایا کہ کانکنی کی قانونی حالت کی جانچ کی جا رہی ہے اور اگر غیر قانونی کانکنی کی تصدیق ہوتی ہے تو متعلقہ ٹھیکہ داروں اور ایجنسیوں کے خلاف سخت کارروائی کی جائے گی۔
