برازیل کی سپریم کورٹ نے سابق صدر بولسونارو کو بغاوت کی سازش کے جرم میں مجرم قرار دیتے ہوئے 27 سال اور 3 ماہ قید کی سزا سنا دی۔ سپریم کورٹ کے 5 رکنی بینچ میں 4 ججز نے سزا کے حق میں فیصلہ دیا جبکہ ایک جج نے انہیں تمام الزامات سے بری کرنے کے حق میں ووٹ دیا۔
گھر میں نظر بند سابق صدر عدالت میں پیش نہیں ہوئے، اور ان کے وکیل نے فیصلے کے خلاف اپیل دائر کرنے کا اعلان کیا۔
وکیل نے مطالبہ کیا کہ اس کیس کی سماعت کے لیے 11 ججز پر مشتمل فل کورٹ تشکیل دی جائے۔
امریکی صدر کا رد عمل
امریکی صدرڈونلڈ ٹرمپ نے برازیل کے سابق صدربولسونارو کی سزا مایوس کن قرار دےدی، صدر ٹرمپ نے میڈیا سے گفتگو میں کہا برازیلین سپریم کورٹ کا فیصلہ غیرمتوقع ہے۔
دوسری جانب عدالتی فیصلہ آنے کے بعد سابق برازیلین صدر بولسوناروکےحق میں متعدد شہروں میں مظاہرے شروع ہوگئے۔
یاد رہےکہ بولسونارو پر 2022 کے الیکشن کے بعد اقتدار پر قبضے کی کوشش کا الزام تھا۔
