العتبہ عباسیہ کا اقدام: کربلا کے راستوں پر زائرینِ اربعین کی گنتی کے لیے جدید کیمرے نصب
العتبہ عباسیہ کا اقدام: کربلا کے راستوں پر زائرینِ اربعین کی گنتی کے لیے جدید کیمرے نصب
عتبہ عباسیہ مقدسہ کے "محکمہ مواصلات و انفارمیشن سیکیورٹی” نے امام حسین علیہ السلام کے اربعین کے زائرین کی گنتی اور ان کی نقل و حرکت کا تجزیہ کرنے کے لیے مصنوعی ذہانت (AI) پر مبنی جدید کیمرے نصب کرنا شروع کر دیے ہیں۔
محکمے کے سربراہ، انجینئر فراس عباس حمزہ نے بتایا کہ ان کی ٹیم نے ان کیمروں کی تنصیب کا آغاز کربلا مقدسہ کی طرف جانے والے پانچ اہم راستوں پر کیا ہے، جو اربعین کے موقع پر زائرین کی آمد و رفت کے بڑے راستے سمجھے جاتے ہیں۔
انہوں نے مزید بتایا کہ یہ منصوبہ متعلقہ سرکاری اداروں کے ساتھ باہمی رابطے اور تعاون کے تحت مکمل کیا جا رہا ہے۔ نصب کیے جانے والے کیمرے جدید ٹیکنالوجی سے لیس ہیں جو راہ گیروں اور سواری پر سوار افراد کی گنتی اور ان کی حرکت کا تجزیہ کرنے کی صلاحیت رکھتے ہیں۔
انجینئر حمزہ کے مطابق، اس منصوبے کا مقصد متعلقہ اداروں کو اربعین کے دوران زائرین کی میزبانی اور ہجوم کی مؤثر انداز میں منظم کرنے کے لیے درست اور بروقت اعداد و شمار فراہم کرنا ہے، تاکہ سہولیات کی فراہمی اور منصوبہ بندی بہتر طور پر کی جا سکے۔
