ماہ رمضان کے بعد صحت کا خیال رکھنے کے مفید طریقے
رمضان المبارک میں روزوں کی وجہ سے نہ صرف ہماری غذائی عادات تبدیل ہوتی ہیں بلکہ روزمرہ کی زندگی کا معمول بھی مختلف ہو جاتا ہے۔ عید کے بعد اچانک معمول کی خوراک پر واپس آنا بعض افراد کے لیے مشکل ہو سکتا ہے، جس سے ہاضمے اور دیگر صحت کے مسائل پیدا ہو سکتے ہیں۔ صحت مند طرز زندگی برقرار رکھنے کے لیے درج ذیل نکات پر عمل کیا جا سکتا ہے۔
رمضان کے دوران مشروبات اور میٹھی اشیاء کا استعمال عام طور پر بڑھ جاتا ہے، لیکن عید کے بعد ان کا حد سے زیادہ استعمال ہاضمے اور معدے کے مسائل پیدا کر سکتا ہے۔ ماہرین صحت کے مطابق چینی کی مقدار کو محدود رکھنا اور قدرتی مشروبات کا استعمال کرنا زیادہ فائدہ مند ہوتا ہے۔
رمضان کے بعد صحت مند ناشتے کی عادت اپنانا ضروری ہے۔ ماہرین کے مطابق ناشتہ سحری کی طرح ایسا ہونا چاہیے جو دیر تک توانائی فراہم کرے، جیسے کہ آہستہ ہضم ہونے والے کاربوہائیڈریٹس، پروٹین اور صحت مند چکنائیوں پر مشتمل غذا۔ یہ غذائیں دن بھر جسم کو ضروری توانائی فراہم کرتی ہیں۔
رمضان کے بعد زیادہ مرغن اور تلی ہوئی اشیاء کھانے کے بجائے ہلکی اور متوازن غذا کا استعمال کرنا چاہیے۔ دوپہر کے کھانے میں ہلکی غذائیں جیسے سبزیاں، دالیں اور دہی شامل کرنا فائدہ مند ہوتا ہے۔ علاوہ ازیں، گرمی کے موسم میں کولڈ ڈرنکس اور کیفین والے مشروبات کی مقدار محدود رکھنی چاہیے، کیونکہ یہ جسم میں پانی کی کمی کا باعث بن سکتے ہیں۔
رمضان کے دوران محدود خوراک کھانے کی عادت پڑ جاتی ہے، لہٰذا عید کے بعد زیادہ کھانے سے اجتناب کرنا ضروری ہے۔ بھوک سے زیادہ کھانے سے معدے پر بوجھ بڑھ سکتا ہے، جو صحت کے مسائل کو جنم دے سکتا ہے۔ کھانے میں اعتدال اور صحت مند خوراک کا انتخاب کرنا بہتر ہوتا ہے۔
رمضان کے دوران جسمانی سرگرمی محدود ہو جاتی ہے، اس لیے بعد میں ورزش اور چہل قدمی کو معمول بنانا ضروری ہے۔ ہلکی پھلکی ورزش، یوگا یا چہل قدمی جسم کو متحرک رکھتی ہے اور ہاضمے کو بہتر بناتی ہے۔
رمضان المبارک کے بعد صحت مند طرز زندگی اپنانا ضروری ہے تاکہ جسمانی توازن برقرار رہے۔ متوازن خوراک، جسمانی سرگرمی اور مناسب پانی کی مقدار لینے سے صحت مند طرز زندگی برقرار رکھا جا سکتا ہے۔
