عراق: شیعہ فیلی کردوں کے خلاف نسل کشی کو بین الاقوامی سطح پر اجاگر کرنے کے لیے قانونی ٹیم تشکیل

شیعہ فیلی کردوں کے خلاف ہونے والی نسل کشی کو عالمی سطح پر اجاگر کرنے کے لیے ایک خصوصی قانونی ٹیم تشکیل دی گئی ہے، جو اس معاملے کو بین الاقوامی عدالتِ انصاف (ICJ) اور عالمی تنظیموں کے سامنے پیش کرے گی۔

یہ ٹیم جج منیر حداد اور کمال قیتولی کی قیادت میں دی ہیگ اور جنیوا روانہ ہوئی، جہاں انہوں نے 1948 کے نسل کشی کنونشن کی بنیاد پر قانونی یادداشتیں جمع کرائیں۔ جج منیر حداد نے 20 فروری 2025 کو بین الاقوامی عدالتِ انصاف کا دورہ کیا، جبکہ کمال قیتولی نے اقوام متحدہ کے اداروں میں قانونی دستاویزات جمع کرائیں۔

یہ اقدام بین الاقوامی قانونی نظائر اور اقوام متحدہ کی سلامتی کونسل کی قراردادوں (661، 688 اور 1483) کے تحت کیا گیا ہے، جو عراق کے سابقہ ظالمانہ نظام کے تحت ہونے والے جرائم میں احتساب پر زور دیتی ہیں۔ جج منیر حداد، جنہوں نے صدام حسین کی سزائے موت کی نگرانی کی تھی، اب فیلی کردوں کے مقدمے کو بین الاقوامی عدلیہ تک لے جانے کی کوشش کر رہے ہیں، تاکہ ان کے مصائب کو عالمی سطح پر تسلیم کرایا جا سکے۔