تہران میں اچانک بجلی بند، ایران شدید توانائی بحران کا شکار

منگل کی شام تہران کے مختلف علاقوں میں بجلی کی غیر اعلانیہ بندش دیکھی گئی، جس کے بعد حکومت نے توانائی بحران کے باعث تمام اسکولوں، جامعات اور سرکاری دفاتر کو بدھ کے روز بند کرنے کا اعلان کیا۔

ایران کی سرکاری خبر رساں ایجنسی کے مطابق، بجلی کی بندش نرماک، تہران پارس، پاسداران، شہرک غرب اور وسطی تہران سمیت کئی علاقوں میں ہوئی۔ گیس اور ڈیزل کی قلت کے باعث پاور پلانٹس بجلی پیدا کرنے میں ناکام رہے، جس کے نتیجے میں بجلی کا بحران پیدا ہوا۔

ایران کی سرکاری بجلی کمپنی توانیر (Tavanir) نے وضاحت کی کہ بجلی کے ان خلل کی وجوہات سرد موسم، گھریلو گیس کے زیادہ استعمال اور گیس کی ترسیل میں کمی ہیں۔ بجلی کی بندش کے باعث انٹرنیٹ سروس متاثر ہوئی اور ٹریفک جام پیدا ہوا، کیونکہ ٹریفک سگنلز کام کرنا بند کر گئے۔

اس بحران نے ایران کی توانائی پالیسی پر سوالات کھڑے کر دیے ہیں۔ ایران میں 80% بجلی تھرمل پاور پلانٹس پر منحصر ہے، جو گیس پر چلتے ہیں۔ حکومت مازوت (تیل کی ایک آلودہ قسم) جلانے سے گریز کر رہی ہے تاکہ ماحولیاتی آلودگی کو کم کیا جا سکے۔ لیکن ایندھن کی شدید کمی اور بنیادی ڈھانچے میں عدم سرمایہ کاری کی وجہ سے ایران کو ایک مشکل ترین سردی کا سامنا ہے۔