تہران کی سپریم کورٹ میں حملہ: دو سینئر ایرانی ججز جانبحق

ایرانی عدلیہ اور سرکاری میڈیا کے مطابق، تہران کی سپریم کورٹ میں ایک حملے کے دوران دو سینئر ججز کو قتل کر دیا گیا۔

عدلیہ کے میڈیا سینٹر کے بیان کے مطابق، یہ "قتل” ہفتے کی صبح ایک مسلح شخص نے کیا، جس نے فائرنگ کے بعد خودکشی کر لی۔

قتل ہونے والے ججز کی شناخت حجۃ الاسلام علی رزینی اور محمد مقیسہ کے طور پر ہوئی ہے، جو عدالت کے مختلف شعبوں کے سربراہ تھے۔

بیان میں بتایا گیا کہ یہ دونوں ججز "قومی سلامتی کے خلاف جرائم، جاسوسی، اور دہشت گردی کے خلاف کارروائیوں میں سرگرم تھے” اور انہیں "بہادر اور تجربہ کار” قرار دیا گیا۔

عدلیہ کے ترجمان اصغر جہانگیر نے سرکاری ٹی وی کو بتایا کہ "ایک مسلح شخص پستول کے ساتھ ججز کے کمرے میں داخل ہوا اور ان پر فائرنگ کی۔” حملہ آور کی شناخت اور اس کے مقصد کے بارے میں فوری طور پر کوئی معلومات فراہم نہیں کی گئیں۔