افغانستان میں 2024 میں غربت اور بھوک میں شدت
سال 2024 افغانستان کے لیے غربت، بیروزگاری، بھوک اور موسمیاتی تبدیلیوں کے منفی اثرات کے لحاظ سے ایک چیلنجنگ سال رہا ہے۔
طالبان کی پابندیاں اور بین الاقوامی امداد میں کمی نے ان بحرانوں کو مزید بڑھا دیا ہے۔ایک رپورٹ کے مطابق، 2024 میں افغانستان معاشی، سیاسی اور سماجی چیلنجز کا سامنا کر رہا ہے۔
اقوام متحدہ کی رپورٹ کے مطابق، ملک میں غربت اور بھوک کی شرح 97 فیصد تک پہنچ چکی ہے اور 23 ملین سے زیادہ افراد انسان دوست امداد پر منحصر ہیں۔بین الاقوامی فیڈریشن آف ریڈ کراس اور ریڈ کریسنٹ سوسائٹی نے بتایا ہے کہ اس وقت افغانستان میں 32 لاکھ سے زائد پانچ سال سے کم عمر بچے اور تقریبا 9 لاکھ حاملہ اور دودھ پلانے والی خواتین غذائی قلت کا شکار ہیں۔
غذائی تحفظ کے حوالے سے، افغانستان 2024 میں عالمی بھوک کے اشاریے پر 30 پوائنٹس کے ساتھ "سنگین” حالت میں ہے اور ملک کی 30 فیصد سے زیادہ آبادی غذائی قلت کا سامنا کر رہی ہے۔موسمیاتی تبدیلیوں کا افغانستان پر تباہ کن اثر پڑا ہے۔
2024 کے پہلے چھ ماہ میں، خشک سالی اور سیلاب جیسے شدید موسمی حادثات نے تقریباً 40 ہزار افراد کو بے گھر کر دیا، جن میں سے 50 فیصد بچے تھے۔
طالبان کے دوبارہ اقتدار میں آنے کے بعد، بین الاقوامی اداروں کا انخلا اور خواتین پر پابندیوں نے ملازمت کے مواقع کو شدید طور پر کم کر دیا ہے اور بہت سے لوگ، خاص طور پر نوجوان، ہجرت پر مجبور ہو گئے ہیں۔
طالبان کی جانب سے لگائی گئی پابندیاں، خاص طور پر خواتین کے کام کرنے پر پابندی، معیشت اور معاشرے پر منفی اثرات مرتب کر رہی ہیں۔یہ پابندیاں فعال ورک فورس میں کمی کا باعث بنی ہیں اور بین الاقوامی امداد پر انحصار میں اضافہ ہوا ہے۔بین الاقوامی امدادی ادارے افغانستان کی بحرانی صورتحال کے بارے میں انتباہ دے رہے ہیں۔
ان کا کہنا ہے کہ لاکھوں جانوں کو بچانے کے لیے مزید امداد کی ضرورت ہے اور فنڈنگ میں کمی بعض ضروری پروگرامز کے بند ہونے کا باعث بن سکتی ہے۔
حالیہ رپورٹ میں، عالمی فوڈ پروگرام نے کہا کہ اس سال موسم سرما کے دوران وہ صرف 60 لاکھ افراد کو امداد فراہم کر سکیں گے اور لاکھوں افراد بنیادی غذائی امداد سے محروم رہیں گے۔
