میرٹھ، اتر پردیش میں ایک 19 سالہ مسلم نوجوان پر ہندوتوا ہجوم نے مبینہ طور پر حملہ کیا، مارپیٹ کی اور مذہبی نعرہ لگانے پر مجبور کیا۔ متاثرہ کے اہل خانہ کے مطابق، نوجوان کو ہفتے کی رات گھر واپسی کے دوران روک کر زدوکوب کیا گیا۔ حملہ آوروں نے اسے ایک سنسان مقام پر لے جا کر تشدد کا نشانہ بنایا اور اس کا موبائل فون بھی چھین لیا۔
متاثرہ خاندان نے پولیس میں شکایت درج کروائی، جس میں دعویٰ کیا گیا کہ نوجوان کو زبردستی مذہبی نعرے لگانے پر مجبور کیا گیا۔ واقعے کے بعد اسے شدید زخمی حالت میں اسپتال میں داخل کروایا گیا، جہاں وہ صدمے کا شکار ہے۔
پولیس نے ابتدائی تحقیقات میں اس بات کی تردید کی ہے کہ واقعے میں مذہبی نعرہ لگانے پر مجبور کیا گیا۔ پولیس کے مطابق، یہ واقعہ آپسی دشمنی کا نتیجہ معلوم ہوتا ہے اور اس سلسلے میں مختلف دفعات کے تحت مقدمہ درج کیا گیا ہے۔ متاثرہ نوجوان اس وقت ایک نجی اسپتال میں زیر علاج ہے اور اس کی حالت خطرے سے باہر بتائی جا رہی ہے، تاہم وہ ذہنی دباؤ کا شکار ہے۔
