غیر شیعہ ذرائع سے منقول ہر دعا اور نماز معتبر نہیں: آیۃ اللہ العظمیٰ شیرازی

مرجع عالی قدر آیۃ اللہ العظمیٰ سید صادق حسینی شیرازی کا روزانہ علمی اجلاس ہفتہ، 15 ربیع الاول 1448 ہجری کو منعقد ہوا۔

اس نشست میں بھی گزشتہ علمی نشستوں کی طرح معظم لہ نے حاضرین کی جانب سے مختلف فقہی مسائل کے متعلق پوچھے گئے سوالات کے جوابات دیے۔

آیۃ اللہ العظمیٰ شیرازی نے عامہ کی کتابوں میں مذکور ادعیہ اور رسولِ خدا حضرت محمد مصطفیٰ صلی اللہ علیہ وآلہ وسلم سے منقول بعض نمازوں کے معتبر ہونے کے بارے میں فرمایا: اس نوعیت کی دعاؤں اور نمازوں کی کوئی معتبر حیثیت نہیں ہے اور فقہاء بھی ان کے صحیح ہونے کے قائل نہیں ہیں۔

معظم لہ نے مزید فرمایا: جو دعا یا نماز غیر شیعہ ذرائع سے منقول ہو، وہ معتبر نہیں ہے؛ لیکن اگر کوئی دعا یا نماز شیعہ ذرائع سے منقول ہو، اگرچہ اس کی سند معتبر نہ ہو، تو وہ قاعدۂ تسامح میں شامل ہوگی۔

انہوں نے مزید وضاحت کرتے ہوئے فرمایا: البتہ اگر کوئی دعا یا نماز شیعہ ذرائع سے نقل ہوئی ہو، لیکن شیعہ راویوں نے اسے عامہ سے نقل کیا ہو، تو اس میں کوئی اشکال نہیں ہے۔