سہارنپور کلکٹریٹ کی 70 سالہ مسجد کو ہٹانے کا عدالتی حکم

سہارنپور کلکٹریٹ کی 70 سالہ مسجد کو ہٹانے کا عدالتی حکم

اتر پردیش کے سہارنپور کلکٹریٹ احاطے میں واقع تقریباً 70 سال پرانی مسجد کو ہٹانے کا حکم سٹی مجسٹریٹ کی عدالت نے جاری کیا ہے۔ عدالت نے مسجد کو سرکاری زمین پر قائم غیر مجاز تعمیر قرار دیتے ہوئے متعلقہ فریقوں کو 30 دن کے اندر خود قبضہ ہٹانے کی ہدایت دی ہے۔

عدالت کے مطابق خسرہ نمبر 539 کی زمین سرکاری ریکارڈ میں کچہری و کلکٹریٹ کے نام درج ہے، جبکہ مسجد 315 مربع میٹر رقبے پر تعمیر ہے۔ حکم میں قبضہ نہ ہٹانے کی صورت میں انتظامیہ کو کارروائی کا اختیار دیا گیا ہے اور 6 کروڑ 41 لاکھ روپے سے زائد جرمانہ بھی عائد کیا گیا ہے۔ یہ کارروائی ایک شکایت کے بعد شروع ہوئی تھی، جس میں مسجد کے احاطے کے استعمال سے متعلق اعتراضات اٹھائے گئے تھے۔