کربلائے معلیٰ میں مرجع عالی قدر آیۃ اللہ العظمیٰ سید صادق حسینی شیرازی سے وابستہ ادارہ حوزۂ علمیہ علامہ محقق کرکی قدس سرہ کے طلاب کا تبلیغی پروگرام، جو یکم محرم الحرام سے شروع ہوا تھا، رواں سال ماہِ صفر کے اختتام تک عراق کے مختلف صوبوں میں بھرپور انداز میں جاری رہے گا۔
اس پروگرام کے تحت علماء اور مبلغین مختلف شہروں اور علاقوں میں مجالس، دینی اجتماعات اور تبلیغی نشستوں میں شرکت کر رہے ہیں۔ ماہِ محرم کی آخری شبوں میں انہوں نے حضرت امام حسین علیہ السلام کی شہادت کے بعد پیش آنے والے المناک واقعات، نہضتِ عاشورا کے پیغامات اور اس کے تربیتی و اصلاحی اسباق کو مؤثر انداز میں بیان کیا۔
مبلغین نے زیارتِ اربعین کی عظمت اور اس میں وسیع پیمانے پر شرکت کی اہمیت پر زور دیتے ہوئے مؤمنین سے اپیل کی کہ وہ گزشتہ برسوں کی نسبت زیادہ جوش و خروش کے ساتھ اس عظیم ایمانی اجتماع میں شریک ہوں۔
انہوں نے زیارتِ اربعین کو زیادہ سے زیادہ شایانِ شان انداز میں منعقد کرنے کے حوالے سے مرجعِ عالی قدر آیۃ اللہ العظمیٰ سید صادق حسینی شیرازی کی ہدایات پر عمل کرنے کی بھی تاکید کی۔
یہ تبلیغی سلسلہ ماہِ صفر کے اختتام تک جاری رہے گا، جس کے دوران حوزۂ علمیہ کے طلاب عراق کے مختلف شہروں اور علاقوں میں اہلِ بیت علیہم السلام کی تعلیمات کی ترویج، ثقافتِ عاشورا کے فروغ اور شعائرِ حسینی میں عوام کی بھرپور شرکت کی ترغیب دیتے رہیں گے۔
