امام حسین علیہ السلام اپنی ولادت سے پہلے، عالمِ نور میں، بلکہ ملائکہ کی تخلیق سے بھی قبل، واقعۂ کربلا کی ایک ایک جزئیات سے مکمل طور پر آگاہ تھے: آیۃ اللہ العظمیٰ شیرازی

امام حسین علیہ السلام اپنی ولادت سے پہلے، عالمِ نور میں، بلکہ ملائکہ کی تخلیق سے بھی قبل، واقعۂ کربلا کی ایک ایک جزئیات سے مکمل طور پر آگاہ تھے: آیۃ اللہ العظمیٰ شیرازی

مرجع عالی قدر آیۃ اللہ العظمیٰ سید صادق حسینی شیرازی کے روزانہ علمی نشست کا انعقاد جمعہ، 17 محرم الحرام 1448ھ کو ہوا۔

اس نشست میں حسبِ سابق، آپ نے شرکائے مجلس کے مختلف فقہی سوالات کے جوابات عنایت فرمائے۔

امام حسین علیہ السلام کے واقعۂ عاشورا سے پیشگی علم کے بارے میں گفتگو کرتے ہوئے آیۃ اللہ العظمیٰ شیرازی نے فرمایا: حضرت سید الشہداء امام حسین علیہ السلام اپنی ولادت سے پہلے، ولادت کے وقت، شیرخوارگی کے دور میں، اور اس کے بعد بھی، واقعۂ کربلا کے تمام مراحل سے مکمل طور پر آگاہ تھے۔ رسولِ اکرم صلی اللہ علیہ وآلہ وسلم اور امیر المؤمنین حضرت علی علیہ السلام سے منقول متعدد روایات میں واقعۂ کربلا کی ایک ایک تفصیل بیان ہوئی ہے، اور یہ واضح کر دیا گیا تھا کہ امام حسین علیہ السلام پر کیا کیا مصائب آئیں گے۔

آپ نے مزید فرمایا کہ امام حسین علیہ السلام کو پیش آنے والے تمام واقعات کا پہلے ہی سے علم تھا، اور یہ حقیقت متعدد روایات اور خود ائمۂ اہلِ بیت علیہم السلام کے ارشادات میں مذکور ہے۔

آیۃ اللہ العظمیٰ شیرازی نے مزید فرمایا کہ امام حسین علیہ السلام کا مقصد دینِ اسلام کے چہرے سے ایک نہایت عظیم انحراف اور بہت بڑے منکر کو مٹانا تھا، اور آپ اپنے اس عظیم مقصد میں کامیاب ہوئے۔ یہ اقدام امام حسین علیہ السلام پر واجب تھا۔ اگرچہ ممکن ہے یہ وجوب، وجوبِ تشریعی نہ ہو، کیونکہ بعض روایات کے مطابق اللہ تعالیٰ نے آپ کو اختیار دیا تھا کہ اگر چاہیں تو شہادت کو قبول نہ کریں، لیکن یہ ایک وجوبِ تکوینی تھا۔

آیت اللہ العظمیٰ سید صادق حسینی شیرازی نے تاکید فرمائی کہ امام حسین علیہ السلام عالمِ نور میں، بلکہ اس وقت سے بھی پہلے جب اللہ تعالیٰ نے حضرت جبرئیل اور حضرت میکائیل علیہما السلام کو پیدا فرمایا، واقعۂ کربلا کی تمام چھوٹی بڑی تفصیلات سے مکمل آگاہی رکھتے تھے۔