ماہِ محرم الحرام کے آغاز اور آلِ محمد علیہم السلام کے جانسوز ایامِ عزا کی آمد کے ساتھ ہی دمشق میں حضرت عقیلۂ بنی ہاشم زینب کبریٰ سلام اللہ علیہا کا نورانی اور مقدس روضہ مبارک سراپا غم و اندوہ کا منظر پیش کرنے لگا۔
شیعہ خبر رساں ایجنسی کے مطابق، اس ماہ عزا کی آمد کے موقع پر روضۂ مقدس کے مخلص خادموں نے اشک بار آنکھوں کے ساتھ حرم کے صحنوں، گنبدِ مطہر اور رواقوں میں سیاہ پرچم اور تعزیتی کتبے نصب کئے، تاکہ محرم الحرام کے سوگوار ماحول کی عکاسی کی جا سکے۔
اس روح پرور فضاسازی کی تکمیل کے بعد محرم الحرام کی پہلی شب کی خصوصی مجلسِ عزا دمشق میں زائرین اور حسینی انجمنوں کی پرجوش شرکت کے ساتھ منعقد ہوئی، اور یوں امیرالمؤمنین حضرت علی علیہ السلام کی دخترِ گرامی کے روضہ مقدس نے باقاعدہ طور پر حضرت سیدالشہداء امام حسین علیہ السلام کے عزاداروں کی میزبانی کا آغاز کیا۔
