لبنان کی امام بارگاہوں، موکبوں اور خدمت گاہوں کی یونین کا ماہِ محرم 1448ھ کے سلسلہ میں بیروت میں دفتر آیۃ اللہ العظمیٰ شیرازی میں میٹنگ

لبنان کی امام بارگاہوں، موکبوں اور خدمت گاہوں کی یونین کا ایک وسیع میٹنگ ماہِ محرم الحرام 1448ھ کے عزاداری پروگراموں کی تیاریوں اور منصوبہ بندی کا جائزہ لینے کے لئے 27 ذی الحجہ 1447ھ کو لبنان کے شہر بیروت میں مرجعِ عالی قدر آیۃ اللہ العظمیٰ سید صادق حسینی شیرازی کے دفتر میں منعقد ہوئی۔

میٹنگ کا آغاز حجۃ الاسلام والمسلمین شیخ جلال معاش، نمائندۂ آیت اللہ العظمیٰ شیرازی، کے خطاب سے ہوا۔ انہوں نے اپنے خطاب میں موجودہ حالات اور مختلف مشکلات کے باوجود حضرت سید الشہداء امام حسین علیہ السلام کی عزاداری کے انعقاد کی ضرورت پر زور دیا۔

انہوں نے کورونا وبا کے دوران دینی شعائر کے احیاء میں مؤمنین کی استقامت کا حوالہ دیتے ہوئے کہا کہ اہلِ بیت علیہم السلام کے پیروکاروں کا عزم و ارادہ، ان کے امر کی ترویج اور شعائر کے احیاء کے سلسلہ میں، کسی بھی چیلنج یا رکاوٹ کے سامنے کمزور نہیں پڑے گا۔

اس کے بعد لبنان میں یونین کے رابطہ کار حسین الشاعر نے خطاب کرتے ہوئے شعائرِ حسینی کی اسٹریٹجک اور بنیادی اہمیت پر روشنی ڈالی۔

انہوں نے کہا کہ تاریخ کے مختلف ادوار میں بہت سی قومیں اور مکاتبِ فکر مٹ گئے، لیکن اسلامِ ناب اور مکتبِ اہلِ بیت علیہم السلام شعائرِ حسینی سے وابستگی کی برکت سے محفوظ اور زندہ رہے ہیں۔

انہوں نے ان شعائر کو امتِ اسلامی کی شناخت، استقامت اور بقا کا ضامن قرار دیا۔

میٹنگ کے دوران شرکاء نے لبنان کے مختلف علاقوں میں موجود حالات اور درپیش چیلنجز کے حوالے سے اپنی آراء اور رپورٹس پیش کیں اور اس عزم کا اظہار کیا کہ وہ ماہِ محرم میں عزاداری کی مجالس کے شایانِ شان انعقاد اور زائرین و عزاداروں کی خدمت کے لئے مکمل طور پر آمادہ ہیں۔

میٹنگ کا اختتام مجلسِ عزائے حسینی کے انعقاد پر ہوا۔