آیت اللہ العظمیٰ شیرازی نے آیت اللہ العظمیٰ فیاض کے فرزند کو ٹیلی فون کے ذریعہ تعزیت دی
مرجع عالی قدر مرحوم آیت اللہ العظمیٰ شیخ محمد اسحاق فیاض کی رحلت پُر ملال کے بعد، مرجع عالی قدر آیت اللہ العظمیٰ سید صادق حسینی شیرازی نے اُن کے فرزند سے ٹیلی فون پر رابطہ فرما کر اپنے قلبی تعزیت و ہمدردی کا اظہار فرمایا۔
اس گفتگو میں معظم لہ نے اس جلیل القدر فقیہ کی جدائی پر اپنے گہرے رنج و غم کا اظہار فرماتے ہوئے اُن کی رحلت کو حوزہ ہائے علمیہ اور عالمِ تشیع کے لیے ایک عظیم خسارہ قرار دیا، اور بارگاہِ ایزدی میں اس مرحوم سعید کے درجات کی بلندی اور پس ماندگان کے لیے صبرِ جمیل و اجرِ عظیم کی دعا فرمائی۔
معظم لہ نے مرحوم آیت اللہ العظمیٰ فیاض کی علمی و دینی خدمات کا خصوصی تذکرہ فرماتے ہوئے درس و تدریس، شاگردوں کی تربیت اور حوزہ ہائے علمیہ کے فقہی مبانی کی حفاظت میں ان کے گراں قدر کردار کو خراجِ تحسین پیش کیا۔
مرجع فقید کے فرزند نے بھی آیت اللہ العظمیٰ شیرازی کے اس تعزیتی رابطے پر اظہارِ تشکر فرماتے ہوئے کہا کہ اس ٹیلی فون نے خاندان اور متعلقین کے دل کو بڑی تسلی بخشی۔
قابلِ ذکر ہے کہ مرحوم آیت اللہ العظمیٰ شیخ محمد اسحاق فیاض حوزہ علمیہ نجف اشرف کے ممتاز مراجعِ تقلید میں سے تھے جن کی ولادت ۱۳۰۹ ہجری شمسی میں افغانستان میں ہوئی۔ انہوں نے نجف اشرف میں طویل عرصے تک علمِ فقہ و اصول کی تحصیل و تدریس فرمائی اور بے شمار شاگردوں کی تربیت کی۔ وہ آیت اللہ العظمیٰ سید ابوالقاسم خوئی کے ممتاز شاگردوں میں شمار ہوتے تھے اور فقہ و اصول کے میدان میں انہوں نے گراں قدر علمی آثار یادگار چھوڑے۔
