مشرقِ وسطیٰ میں کشیدگی میں اضافے اور خطے کے ممالک کے درمیان تنازعات کے شدت اختیار کرنے کے بعد بحرین اور سعودی عرب میں ہونے والی فارمولا ون ریسیں، جو اپریل میں منعقد ہونا تھیں، باضابطہ طور پر منسوخ کر دی گئی ہیں تاکہ ٹیموں اور عملے کو درپیش سیکیورٹی خطرات کو کم کیا جا سکے۔
خبر رساں ایجنسی رائٹرز کی رپورٹ کے مطابق فارمولا ون کی تنظیم اور انٹرنیشنل آٹوموبائل فیڈریشن (FIA) نے خطے کی غیر یقینی صورتحال، میزائل حملوں اور لاجسٹک نقل و حرکت میں رکاوٹوں کا حوالہ دیتے ہوئے اعلان کیا ہے کہ یہ دونوں مقابلے منعقد نہیں ہوں گے۔ اس کے نتیجے میں 2026 کا سیزن 24 ریسوں کے بجائے اب 22 ریسوں کے ساتھ جاری رہے گا۔
اس سے قبل برطانوی اخبار گارڈین نے بھی نشاندہی کی تھی کہ جاری کشیدگی اور ڈرائیوروں، تماشائیوں اور ٹیموں کی سلامتی کو لاحق ممکنہ خطرات کے پیش نظر بحرین اور جدہ میں ان مقابلوں کا انعقاد مناسب نہیں۔ یہ فیصلہ مقامی منتظمین کے ساتھ مشاورت کے بعد کیا گیا ہے۔
ماہرین کے مطابق ان مقابلوں کی منسوخی نہ صرف ریسوں کے شیڈول میں ایک طویل وقفہ پیدا کرے گی بلکہ عالمی فارمولا ون مقابلوں پر قابلِ ذکر مالی اثرات بھی مرتب ہوں گے، کیونکہ یہ دونوں ممالک فارمولا ون کے اہم میزبانوں میں شمار ہوتے ہیں۔
