ایران پر حالیہ فوجی حملوں کے بعد تاریخی عمارتوں اور آثارِ قدیمہ کو نقصان پہنچنے کے خدشات میں اضافہ ہو گیا ہے۔
خبر رساں ادارہ “سہام نیوز” کے مطابق صوبہ اصفہان کے محکمۂ ثقافتی ورثہ، سیاحت اور دستکاری کے نائب سربراہ نے اعلان کیا ہے کہ تاریخی مسجدِ جامع عباسی کے ایوانوں کی کاشیوں کا ایک حصہ حملوں کی شدت سے پیدا ہونے والی لہروں کے باعث گر گیا ہے۔
ریڈیو فردا کی رپورٹ کے مطابق یہ نقصان ایران کے قیمتی ثقافتی ورثے کے تحفظ کے حوالے سے ایک سنجیدہ انتباہ سمجھا جا رہا ہے۔
قابلِ ذکر ہے کہ ایران کے بعض تاریخی مقامات پر “بلیو شیلڈ” (Blue Shield) کا نظام نصب کیا گیا ہے۔ یہ ایک بین الاقوامی نیٹ ورک ہے جس میں ثقافتی ورثے اور عجائب گھروں کے ماہرین شامل ہیں۔
یہ ادارہ یونیسکو کے ضوابط اور 1954ء کے ہیگ کنونشن کے مطابق کام کرتا ہے اور اس کا مقصد ہنگامی حالات اور فوجی حملوں کے دوران ثقافتی آثار کو پہنچنے والے نقصانات کو کم کرنا ہے۔
یونیسکو کے مطابق بلیو شیلڈ حکومتی اداروں، غیر سرکاری تنظیموں اور بعض اوقات فوجی اداروں کے ساتھ تعاون کرتے ہوئے تاریخی عمارتوں، عجائب گھروں اور آرکائیوز کے تحفظ کو یقینی بنانے کی کوشش کرتا ہے۔
ایران کے 29 ثقافتی مقامات یونیسکو کے عالمی ثقافتی ورثے کی فہرست میں شامل ہیں، جس کی وجہ سے یہ ملک ثقافتی ورثے کے اعتبار سے دنیا کے امیر ترین ممالک میں شمار ہوتا ہے۔ ان آثار کا تحفظ آئندہ نسلوں کے لئے نہایت اہم اور ناگزیر سمجھا جاتا ہے۔
