ہالینڈ کے حکام نے دو مسلمان خواتین کے خلاف پولیس کے ایک اہلکار کے نسل پرستانہ رویّے کے الزام پر باضابطہ تحقیقات شروع کر دی ہیں۔
یہ واقعہ گزشتہ پیر کی شام شہر اوترخت میں پیش آیا، جس کی ویڈیوز سوشل میڈیا پر وائرل ہونے کے بعد صارفین کی جانب سے شدید ردِعمل سامنے آیا۔
منظرِ عام پر آنے والی ویڈیوز میں دیکھا جا سکتا ہے کہ ایک پولیس اہلکار دو مسلمان خواتین پر لاتوں اور ڈنڈے سے حملہ کر رہا ہے۔
عربی ویب سائٹ عربی 21 کے مطابق، ہالینڈ کی پولیس نے اعلان کیا ہے کہ تمام ویڈیوز کو باضابطہ تحقیقات کے دائرے میں پرکھا جائے گا تاکہ واقعہ کی مکمل تفصیلات اور اہلکاروں کے محرکات واضح ہو سکیں۔
ہالینڈ کے سرکاری ریڈیو اور ٹیلی ویژن نیٹ ورک نے پولیس کے ترجمان کے حوالے سے رپورٹ کیا ہے کہ اس رویّے میں نسل پرستانہ محرکات کے امکان کا بھی جائزہ لیا جا رہا ہے۔
انسانی حقوق کے کارکنوں نے پولیس کے اس طرزِ عمل کو تشویشناک قرار دیتے ہوئے شفافیت اور ذمہ داروں سے جوابدہی کا مطالبہ کیا ہے۔
یہ واقعہ ایک بار پھر یورپ میں مذہبی اقلیتوں کے خلاف امتیازی سلوک کے حوالے سے بحث کو نمایاں کر گیا ہے۔
