سید الشہداء حضرت ابو عبداللہ امام حسین علیہ الصلوۃ والسلام کی ولادت باسعادت کے موقع پر ہندوستان بھر میں عاشقان مولا حسین علیہ السلام نے انتہائی عقیدت و احترام اور جوش و خروش سے محفلیں اور نذر منعقد کر کےخوشیاں منائیں۔
ہندوستان کے دارالحکومت دہلی کی کربلا شاہ مرداں میں محفل مسرت منعقد ہوئی، اسی طرح مصطفی آباد، مسجد باب العلم، مزار شہید رابع، حیدری ہال سمیت تمام مساجد اور امام بارگاہوں میں جشن ولادت منعقد ہوا اور مومنین کے گھروں میں نذر کا اہتمام ہوا۔ جنمیں مومنین و مومنات نے کثیر تعداد میں شرکت کی۔
اسی طرح حیدرآباد میں بھی تمام مساجد، عاشور خانوں اور مومنین کے گھروں پر جشن امام حسین علیہ السلام منعقد ہوا اور نذر مولا کا اہتمام ہوا۔
ممبئی میں جشن امام حسین علیہ السلام حسب روایت تمام امام بارگاہوں اور مساجد میں منعقد ہوا۔
لکھنو میں قدیمی محفل روضہ کاظمین اور کربلا دیانت الدولہ میں منعقد ہوئی جس میں شعراء نے بارگاہ امام حسین علیہ السلام میں کلام پیش کیا، اسی طرح کالا امام باڑہ پیر بخارا میں محفل منعقد ہوئی جسے مولانا سید علی ہاشم عابدی نے خطاب کیا۔ اس کے علاوہ مومنین کے گھروں پر بھی محافل منعقد ہوئیں اور نذر امام حسین علیہ السلام کا اہتمام ہوا جس میں مومنین و مومنات نے کثیر تعداد میں شرکت کی۔ مفتی گنج اور کشمیری محلہ میں جلوس مسرت بھی برآمد ہوا۔
اسی طرح امروہہ، سرسی، جونپور، بڑاگاوں شاہگنج میں جشن منعقد ہوا۔
المختصر پورے ہندوستان میں جہاں بھی محبان امام حسین علیہ السلام رہتے ہیں وہاں کی فضا خوشگوار اور مسرت بخش نظر آئی۔
